「波台黐線佬」一連兩日辦十年展有信心新球迷變「die hard fans」

【獨媒報導】港足球迷會「波台黐線佬」今年成立十周年，今日及明日（6月28日至29日）一連兩日舉行《波台黐線佬10年展》，回顧香港球迷十年來的變化，展出成立至今一系列重要時刻的相片，並售賣限定產品，以及推出全新「Hong Kong Till I Die」打氣頸巾。核心成員Chester 表示，從未想過「波台」捱過十年，曾經歷過迷失階段，特別在疫情期間沒有賽事，「大家都struggle（掙扎）得好犀利」，有幸個別成員仍堅持下去，並在「新血」加入及港隊成績漸佳下重燃「大家團火」。

「波台」的最大目標「想香港足球好」，Chester 盼資深球迷「唔好成為一拃老屎忽球迷，要welcome 一啲新球迷，相信每一個成為球迷都會經歷過忽然球迷呢個階段」，有信心新球迷會變成「die hard fans」。

首幅旗幟作客深圳寶安時遭沒收

「波台黐線佬」自2015年成立至今十年，當初由十多個志同道合港隊球迷「圍威喂」創立。為紀念10年來球迷的心路歷程，「黐線佬」將於6月28至29日在深水埗黃竹街1F號，舉辦《波台黐線佬10年展》，擺設初期成立至今的歷史及相片，其中一張是第一幅黑白色設計手畫「波台」旗幟，不過實物已在他們2015年9月3日作客深圳寶安時遭沒收。

現場亦售賣限定產品，包括電話繩、襪、飲勝杯等；與少爺啤及上水爆谷的聯乘產品；Futbol Terminology服飾；Thunder Feather 護膚及髮型用品；並推出全新「Hong Kong Till I Die」打氣頸巾，另有球迷即影即有打卡牆，以及「黐黐的心」明信片計劃，讓球迷可手寫心聲轉交港隊球員手上。

成立原意想令看台好玩、熱血打氣疫情中曾掙扎放棄

「波台黐線佬」雛形於2015年萌生，當時在高登討論區的「波台」，有一班滿腔熱忱後生仔組織大家入場撐港隊，Chester說，「原意係想有一班人令個看台好玩啲，熱血啲去打氣」，笑言「嗰時啲人成日都話睇波都係黐線㗎嘛，所以我哋都以黐線去自舉」。2015年11月17日旺角大球場的賽事，「波台黐線佬」正式成立。

初期入場撐港隊球迷不多，旺角大球場第28區只坐滿2至3行約50人。不過十年後的啟德賽事，他們的區域有逾2,000人。他坦言從未諗過挨過十年，「我哋中途都有迷失、有放棄」，特別在疫情期間沒有賽事，「大家都struggle（掙扎）得好犀利」，幸得仍有幾個成員堅持營運專頁，並有「新血」加入，「重新燃起大家團火」。他續指後來疫情過去賽事開始復辦，號召力有增無減，眼見看台影響力漸大，同時港隊成績好，令很多人重燃希望。

初期營運「用愛發電」售賣商品扣除成本全入「打氣基金」

這十年最困難是？Chester表示，經營「波台」花不少時間，以及尋找定位。他們一開始主力著重撐港足，但「港隊比賽坦白講唔係好多，上年比較多有20幾場，但係平均一年得5、6場都唔出奇」，要維持活躍度及發展有一定難度。成立初期，成員多為學生，時間較多，步入社會後能付出時間減少。

在「學生時代」，Chester稱「開頭真係用愛發電」，成員們夾錢做打氣工具，至2017、18年開始自家設計產品，第一項推出是「We are Hong Kong」元祖級毛巾，扣除成本後全數存入「打氣基金」。他直言打氣工具成本不算高，產品亦是自行產計。至今「波台」目前運作已較成熟，亦多了商業合作，並組織較大型的活動，「我哋諗得更加多新搞作出嚟，例如整浩瀚嘅旗，今次嘅展覽都花咗好多錢同心血去做。」

訪問在展覽前一日進行，「波台」成員仍在努力布置

十年來，Chester自言最難忘卡塔爾亞洲盃，港隊及「波台」第一次經歷國際性大賽，「當中籌備咗好多嘢，好似Parade、參與過好多球迷活動成班gather，（「波台」核心成員）過半數都有去，所以係好難忘，增進咗好多友誼嘅一個地方，亦都令好多朋友仔撻返着嘅好大原因。」

問到有沒有後悔花十年時間搞「波台」？Chester直言「完全無後悔，後悔無早啲搞大佢」，指到後期先燃起「團火」，非常驕傲一班成員用心用力付出時間，為同一目標去奮鬥，「我哋唔係求賺錢，我哋只係得一個目標，就係想香港足球好，大家都好pure 為呢件事去做，做好多campaign、好多新project，全部都係想幫啲球員，或者令社會更加關注足球」。

經過「坐爆」啟德主場館，「波台」盼未來大家持續關注港足，作為球迷組織，「波台」會繼續主動找品牌合作宣傳港隊，亦期望拓展宣傳其他港隊運動，如手球、籃球、女足等。

盼資深球迷勿成「老屎忽」有信心新球迷變「die hard fans」

談及上場啟德賽事，Chester 盼資深球迷「唔好成為一拃老屎忽球迷，要welcome 一啲新球迷，相信每一個成為球迷都會經歷過忽然球迷呢個階段，why no open mind 少少接受佢哋。」他指新球迷未必識所有球員或打氣，一班較資深球迷應提供協助，如製作打氣指南方便大家投入，「舊嘅球迷千祈唔好抱住，我比你更資深而我比你優越心態對待新球迷。」

至於新球迷，Chester 表示非常歡迎加入，「enjoy 呢個party」，認為睇波不一定要識波或認識很多球員，「只要鍾意入到嚟enjoy 玩得開心，有啲嘢攞走咁就已經好好」，有信心新球迷會變成「die hard fans」。