【獨媒報導】香港網球「一哥」黃澤林出戰美國網球公開賽32強，在打足五盤的情況下，不敵15號種子、俄羅斯球手魯布列夫（Andrey Rublev）。黃澤林今晨返港，他感謝香港球迷支持，尤其在凌晨時分仍觀看直播：「其實唔容易㗎，雖然我知道香港人成日都夜瞓，但我都無諗過咁多人去支持我，我見到好多人話5點半都一路支持我，一路睇我，我都好感動。有啲我記得直程飛到去紐約支持我，都好多謝佢哋。」

黃澤林今日清晨返港，大批傳媒在機場守候，他指晉級32強已是對其努力的肯定，並感到自豪。被問到假如時光倒流再戰魯布列夫，其策略及心態上會否有所改變 ，黃澤林稱在第四盤時已十分疲累，「大家都見到我好鬼攰」，自己經驗亦不及對手，形容今次是好好的一課，下一次可以做得更好。

「我第一局就破咗佢，佢開波嘅時候會放一放，保住自己發球局，點知又被我迫到佢第五盤，呢個係好特別嘅經驗。」黃澤林表示今次賽事獲益良多，包括首次打足五盤，學會體力分配、戰術：「我見佢（魯布列夫）第五盤好似打緊第一盤咁，好似仲係無乜嘢，但我就好似好攰，所以要繼續努力。」

分享與世界級球手點滴 與艾卡拿斯交流

被問到應如何調整做得更好，黃澤林指今次賽事對自己來說「很新」，包括從四盤制到五盤制、比賽氣氛及每日要做的事情：「更衣室唔同嘅球手，見到隔離就係就係祖高域、艾卡拿斯，好多平時喺電視見到嘅球手，我以為距離會好遠，你唔打落去就唔知爭幾遠。」黃澤林透露艾卡拿斯認識其教練，二人亦有作交流：「唔係講到佢係艾卡拿斯就有唔同，我哋都係一齊享受網球。」

至於「美網之旅」32強對其意義，黃澤林認為是特別、喜出望外，笑言從外圍賽到32強每場都有機會輸，第二圈外圈賽更險遭對手反勝，「好開心去到呢一步」。

在比賽期間，賽場上不斷傳來廣東話的打氣聲，其中一名女球迷更是穿上本地球隊流浪的球衣。黃澤林感謝對方為自己打氣，「周圍都聽到佢幫我打氣」：「尤其是最尾一場比賽，我打咗3個幾鐘，佢都無停，我都好多謝。」他對紐約亦有那麼多球迷支持自己感到高興：「又有加油，好多唔同支持我嘅說話，我全部都收到晒，其實都好開心，去到美國都可以有咁多人支持我。」

父親到當地打氣 黃澤林冀與家人分享喜悅

此外，黃澤林父親黃悅明亦飛抵當地，為兒子出戰32強賽事打氣。黃澤林希望能與家人分享喜悅，指對剛參與大滿貫賽事的自己來說是大事，「對於佢哋嚟講都係好特別」。

在過去的訪問中，黃澤林曾表示會以贏取大滿貫賽事冠軍為目標，今次率先殺入美網32強：「其實我只想繼續去努力，繼續去享受網球。呢一場波係其中一場啦，之前5場波，我每一場波都係喺好多香港人支持我嘅氣氛底下去打比賽，呢樣嘢係我打網球最開心，就係我可以有好多球迷去睇我比賽，同我自己好享受可以發揮到滿意嘅水準。」

有信心打入世界首100名 將出戰台維斯盃

在今次賽事後，黃澤林的世界排名升至146位，亞洲男單排名第8，並會在9月13至14日出戰在維園舉行的台維斯盃。他表示對賽事有信心，自己作為香港第一球手，希望能協助港隊：「我參賽我就就希望可以贏到，單打、雙打都可以做得好。」

黃澤林提到，有信心可以打入世界排名首100位：「尤其是今次我贏咗2個頭100嘅球手，同世界15又打到五盤，其實我都知道自己實力喺邊度，我要相信自己。」

最想念香港的食物 冀休息與朋友看演唱會

在比賽後，黃澤林在凌晨便上機返港，希望能爭取時間休息。他對上一次返港已是今年7月溫布頓網球錦標賽後，笑言最想念香港的食物，及在「唔洗諗網球」下與朋友看演唱會：「唔好諗網球，想唞一唞，呢6場波都好長，我成日都覺得留咗喺美網好耐。」

黃澤林再三感謝球迷支持，指本港其他運動員亦需要港人支持，「見到劍擊有非常好好成績，而家網球又有，希望大家會鍾意網球啦，希望更加享受睇波，就算每一句加油對我嚟講都好緊要，尤其是我自己，成日都出去比賽，要自己一個同教練，無乜好多嘅球迷，有陣時去到墨西哥好難支持到我，所以每一句加油、message都好緊要。」在見記者後，中國香港網總理事會會長鄭明哲向黃澤林送花，他再與父母及姊姊合照。