【獨媒報導】由導演杜琪峯執導的電影《PTU》4K修復版，將在9月6日重新上映，昨晚舉行特別放映場，全場座無虛席。今次港澳重映的一半利潤將捐贈予杜琪峯帶領的「鮮浪潮國際電影節」，以推動香港電影產業及培育新導演人才，杜琪峯率領一眾演員出席映前座談，他在接受傳媒訪問時亦稱「呢樣最緊要」。

藝發局自去年起停止資助由杜琪峯創辦的短片比賽「鮮浪潮國際電影節」，並另行撥款300萬舉辦「短片拍攝推廣計劃」，承辦者必須遵從國家安全條款。

在映前座談中，負責出品的美亞娛樂資訊集團董事總經理李燈旭亦表示，今次港澳重映的一半利潤將捐贈予杜琪峯帶領的「鮮浪潮」，希望能鼓勵更多年輕人加入影圈，「請大家繼續支持香港電影」。除了杜琪峯，《PTU》主要演員任達華、邵美琪、林雪及黃浩然都有出席。

杜琪峯指「300萬真係好抵」 揭拍攝時沒劇本

《PTU》在2003年上映，杜琪峯用了3年時間斷斷續續拍攝，他分享時稱很少重看該套電影，只曾在「回顧展間中望過幾段」：「覺得嗰時好唔成熟，而家都唔成熟，好多地方可以唔係咁。」該套電影僅用了300萬元製作，杜琪峯指當中有很多不完整、不成熟，「但係我覺得300萬真係好抵」。

電影拍攝時間長達3年，杜琪峯笑言無想過演員期間「肥咗」，飾演女沙展的邵美琪便「腫晒」，及後停機10日予對方減肥。杜琪峯又提到《PTU》其實沒有劇本，卻成為編劇游乃海的代表作：「最佳編劇都唔知點嚟，你攞最佳編劇喎，都無編劇點睇！」

即興感覺強 開場冷氣機滴水始想細節

在《PTU》開場中，飾演沙展的林雪在九龍城一間火鍋店打邊爐，及後店內冷氣機滴水，一名黑社會頭目的兒子在店內遭謀殺。杜琪峯就指《PTU》的即興感覺很強，笑言當時店內「真係冷氣機滴水」：「滴水開始諗晒成場戲，知道去隊冧一個人㗎啦，問題就係啲細節都未寫，一路拍一路寫。」

不過，杜琪峯認為「一路拍一路寫」是不好的，對年輕一代亦不好：「要prepare 好啲去拍，但我無辦法改，幾廿歲人都⋯⋯改嚟都無用。」他續提到，游乃海對該套電影有一個基本原則：「無論做咗咩，你唔保護佢都唔好踢爆佢。」另外，電影尾聲有一名小童一邊踩單車一邊偷錢，杜琪峯解釋想法是「小小的錯都係有罪」：「唔知㗎，我覺得係咁，𡃁仔開始有罪。」

「咩事咁邋遢」成金句 任達華坦言感震撼

在電影中，任達華飾演的沙展在機舖內截查頸上有紋身的古惑仔，其「咩事咁邋遢」、「捽甩佢」已成為經典金句。任達華回應時稱「係嘅係嘅」，他先向該名飾演古惑仔的演員說抱歉，「實在係打咗好多巴」，指電影中在開鎗、拳頭及吊威也下，「突然間有一場咁另類嘅暴力美學」：「其實係幾震撼嘅，嗰時一路拍，個心都好唔忍心。」他當時就向對方說「好抱歉」、「呢場戲主要係你嘅」，希望對方能接受其道歉：「其實好震撼，自己都好鍾意嗰場戲。」

電影另一金句就是「著得呢件衫就係自己人」，任達華亦重申「自己人一定要幫」，並即席問林雪：「4點要做咩呀？」林雪即時回應：「唔好行廣東道囉！」任達華再打趣問：「11點後呢？」全場觀眾大笑，林雪不明所以，只表示「11點邊度都唔好行」、「返屋企啦」。

一晚撻足48次 林雪分享期間不禁爆粗

《PTU》在2003年4月中上演，杜琪峯指當時正值沙士，林雪稱在拍攝的時候，亦不知道能否尋回屬於其的警鎗。任達華插咀說「佢就係所有嘢都唔知」，林雪扮杜琪峯的腔調說：「叫你做你就啦，咁多嘢問！」杜琪峯不禁揶揄說：「你識演戲咩！」

電影中其中一個場景在位於廣東道、早已結業中國冰室，林雪在茶餐廳內接到電話後隨即逃跑，逃避黃卓玲的追捕。他憶述拍攝電影的時候，一晚便撻了48次，從晚上撻到早上天光：「你知啦，你攞實物自己做嗰啲呢，一定一錫住自己，真係踩蕉皮撻呀嘛，咁就好。一錫住自己就閪啦⋯⋯唉吔！」全場觀眾大笑，林雪立即「補飛」說「就錯啦」，笑言當時好開心「日日都撻」。

拍攝長達三年 黃浩然：開心仲有咁任性嘅階段

談到最難忘的記憶，在電影中飾演警員的黃浩然表示，「即興演技對我嚟講全完唔得」：「每日淨係行嚟行去，導演話要擺隻手喺呢度，要似PTU，所以我就個個shot 擺隻手喺度。」他對仍有那麼多人鍾意《PTU》感到開心：「自己睇返嗰陣時如果做好啲咪好囉，呢個戲真係有機會攞獎，自己又做得咁差。」

黃浩然形容《PTU》是很好的回憶，對於拍攝長達三年「開心仲有咁任性嘅階段」：「可以花咁多時間，咁多心機去拍一部電影，自己都好珍惜，而家睇返好趕㗎噃開工，嗰陣可以慢慢咀嚼個角色、劇本，其實真係好懷念。」

談團隊精神 杜琪峯指最重要是互信及體諒

電影中其中一幕是，包括任達華在內的一眾警員在大廈門口用電筒照明到樓梯，成為神來之筆。被問到靈感來源，杜琪峯不諱言其實是「無錢」，加上能夠「在公司樓梯搞掂」：「上樓九千人拍過啦，上樓仲乜鬼啫？」

在分享尾聲，杜琪峯指「團隊」就是由不同人組成，包括「夾硬嚟」、「蛇𠺌」及「笨乜」的人等：「其實任何一個團隊，不同工種，互信最重要，同埋需要好嘅領導人。如果帶領嘅通通錯，都幾大鑊。」他表示團隊之間的信任很重要，而且不止於警察，任何團隊都要互信及體諒。

開拍《黑社會3》？ 杜琪峯：呢度香港嚟㗎，小心啲呀講嘢

他們在分享後接受傳媒訪問，均異口同聲對《PTU》感到十分難忘。林雪指出，能夠在20年後能重看4K修復版的《PTU》，而且更可以與觀眾作分享：「你諗吓一部作品，咁耐都咁多人歡迎，你本身一份子，你點可以唔難忘？」

有記者最後問杜琪峯：「我哋仲有無機會睇到《黑社會3》呀，仲有無計劃呀？」杜琪峯就表示：「又係呢句？點講呢？呢度香港嚟㗎，大佬！小心啲呀講嘢！」林雪在旁表示「我都無講嘢」，杜琪峯就稱「我叫我自己呀！有嘅，不過唔知幾時。」

版權: 
禁止衍生