阿棍屋平安渡過十號風球 暫托動物陸續回家
【獨媒報導】流浪動物收容中心阿棍屋在颱風樺加沙襲港前夕，因為憂慮將會水浸，將約140隻貓狗送往暫托家庭避風。最終阿棍屋順利渡過今次十號風球，僅曾三次短暫停電及輕微水浸，未有任何設施及物品損毀。創辦人謝婉儀（Ivy）感激所有參與暫托的家庭。
中心曾3度停電、羊區及小狗區有水浸
位於元朗馬鞍崗的阿棍屋，處於地低窪位置，加上去水渠設計不善，遇上極端天氣皆極易水浸。為保護一眾貓狗安全，阿棍屋「超前部署」，安排約140隻貓狗到暫托家庭避風，並在中心內設防風排水裝置，創辦人Ivy及數名義工則在颱風期間24小時留守，照顧仍在中心的動物。
樺加沙最終為香港帶來的破壞，遠比2018年的山竹為輕。阿棍屋方面，Ivy指只有羊區曾水浸高至約一個卡板位置，以及小狗區輕微水浸，已利用預先準備的吸水機排水至馬路。風暴期間，留守的狗狗處於有蓋區域，雖然橫風橫雨下亦有「撇雨」情況，但她稱「比我哋想像中好好多，我預呢度會冧、水浸、停電咁樣。」十號風球高掛當日，阿棍屋曾3次停電，Ivy指幸好每次維時不長。
Ivy感謝5名義不容辭留守的員工及義工，指他們在凌晨時分主動「輪班」巡視中心，讓她感到安心：「我冇講過要大家巡更，冇諗到佢哋自己幾個自發性去去巡，我已經頂到都凌晨唔記得幾多點，真係要唞一唞又再醒，問一句（情況）點呀，佢哋話得㗎啦你放心，我哋已經幾個夾咗邊個瞓跟住邊個巡。」
料本周內接回所有貓狗
阿棍屋於上星期四（9月25日）開始，接回暫托在外的貓狗，至周六已接回約八成。Ivy提到有部份暫托家庭「想同佢哋（貓狗）玩多幾日」，料本周內可以接回所有貓狗。
《獨媒》記者昨日到訪阿棍屋，部分「回家」的貓狗由義務司機在全港各區幫忙接送，亦有不少暫托家庭親自駕車前來，主動分享貓狗情況，大讚狗仔「好乖」，分別時亦非常不捨，數次回望又「摸頭」才離開。
暫托了3隻老狗及3隻大狗的伊莉，昨日親自送回最後3隻大狗。她是透過流浪貓狗善終的士義務團隊認識阿棍屋，「見到佢哋需要（暫托）咁就聯絡咗佢哋。」伊莉本身提供私人暫托寵物服務，其居住的村屋有多間空房可以使用，故暫托較少家庭能容納的大狗。她暫托失明的洛威拿「霜霜」、兩隻唐狗「椒椒」及「阿福」，指只需教導牠們一次，便已經記住睡覺位置，又懂得返回指定位置小便，笑言「就算屙咗喺廳，『椒椒』會乖乖地坐喺度跟住望住我哋，好似做錯嘢咁。」
伊莉坦言「其實我想領養嘅，但係我哋做暫托嘅話，始終自己地方有狗狗，驚同其他狗狗夾唔嚟，所以就比較難啲，盡可能暫托到嘅都會暫托。」
義務接送的司機Ning，先後在銅鑼灣及跑馬地接回一貓一狗，「我有架車，車尾夠大又有時間，why not。」
有暫托家庭盼領養
暫托亦有意外收獲，便是知道貓狗「入屋」情況。Ivy指中心有較多動物，易令牠們「爭風呷醋」。此外受周遭環境影響情緒，會令動物 「你嘈我又嘈」。不過「入屋」後可能只有一人一狗，動物情緒或較為平靜。
Ivy以從未「入屋」的白色唐狗「雪米糍」為例，其身形龐大，體重達18公斤。她初時估計難以找到暫托家庭，但最終亦獲好心人暫托，Ivy起初擔憂「雪米糍」會否不能適應陌生環境。不過意想不到的時，暫托家庭昨日將「雪米糍」送回中心時，大讚「雪米糍」乖巧安靜，出街亦不會飛撲其他狗，玩玩具時亦懂得「拋接」，亦不會咬實玩具不放：「（話「雪米糍」）玩兩吓就會鬆口，唔會不停同你咁扯，食嘢又乖。講到佢好似完美咁濟。」
她笑言：「我無諗過『雪米糍』咁乖，佢喺籠入邊成日玩水兜，成日將水兜倒瀉晒，但係佢（暫托人）話屋企冇搞亂檔，水兜冇倒瀉，直程一粒聲都冇出，瞓覺就瞓覺。」
Ivy提到，曾「入屋」的貓狗被領養的機會會大增，不少暫托家庭提供動物在家生活的片段，令未來領養人能更了解實際情況：「有人想領養時候，咁我咪可以將啲片show俾佢哋睇，俾佢哋知道原來佢入過屋咁乖，咁個（被領養）機會大咗。」她多次感激暫托家庭「佢哋真係好好，除咗幫我哋渡過難關，我哋都可以認清啲狗仔入屋嘅性格，更加知道狗仔入咗屋係咩情況。」
Ivy透露，最少有5個暫托家庭計劃轉領養，「見到佢（貓狗）好似同我啲狗又夾到，同埋都對咗幾日有感情，不過我話好唔緊要，我哋都會俾時間你去諗去考慮，但你要（送貓狗）返返嚟先。」
