【獨媒報導】大埔作客越南出戰亞冠二分組賽賽事，周四硬撼河內公安。河內連日暴雨，令大埔的訓練亦受一定程度影響，球隊晚上在下塌酒店舉行見面會，讓球迷與球員近距離接觸。在暴雨下，有「綠戰士」球迷更一邊澗水一邊步行，最後用了45分鐘才到達酒店。大埔球員陳肇鈞表示衷心感謝球迷支持：「真係好多謝佢哋冒住危險都嚟，希望值回票價，睇到我哋搏命去踢啦。」

《獨媒》記者 越南河內直擊

大埔上周六與理文激戰120分鐘，憑互射十二碼迫和理文晉級四強，翌日再抵達河內，周一因天雨只能在有蓋仿真草場訓練，今日原獲安排到比賽場地行待體育場（Hang Day Stadium）踩草，並安排球迷到球場觀看訓練，惟未獲越南足協批准。

大埔贈送門票予遠征球迷 李志堅：真係多謝晒大家

河內連日暴雨，行待體育場附近道路今早出現水浸，球隊改為在下塌酒店訓練，並與球迷晚上舉行見面會，約10名球迷出席。另外，大埔亦為一眾球迷贈送50張門票。大埔主教練李志堅表示，周四或會有不少主場球迷，加上天氣欠佳，呼籲大埔球迷要注意人身安全：「真係多謝晒大家！」


Albert（左一）

大埔球迷Albert 自2018年支持球隊，今次遠征河內因為自小看歐洲足球，希望可以跟隨球隊到外地並吶喊助威。Albert 去年亦曾到卡塔爾、烏兹別克為港隊打氣，今次感受則有點不同，因為是球會級賽事。

Albert 每年都會購買數件大埔球衣，今年則在作客球衣印上添姆高夫斯基，但最喜愛的始終是陳肇鈞、鍾偉強，「因為真係由18年就開始睇佢哋」。他又表示，正研究稍後跟隨大埔到澳洲及內地北京出戰另外兩場亞冠二賽事。


Sherman（左）

資深球迷錯過15年前作客成遺憾 今次決心不可錯過

另一名「綠戰士」球迷Sherman 已支持球多年，大埔的賽事總會看到他的蹤影。大埔在2010年首次參與亞協盃，曾作客越南峴港。Sherman提到，當時未能隨隊到峴港成為遺憾，今次已決心不可錯過：「今次再多啲人過嚟，所以有啲期望。」

大埔在2020/21年球季曾自降甲組，Sherman 亦對球隊不離不棄，照樣入場撐到底，抱的心態正是「你贏，我陪你君臨天下，你輸，我陪你東山再起」：「呢個就係足球需要嘅嘢！呢幾年多咗好多球迷支持，對大埔對香港隊都係好事！」

河內公安擁多名越南國家隊成員 陳肇鈞指臨場發揮最重要

大埔球員陳肇鈞向《獨媒》表示，希望周四比賽能如常進行，指對手陣中多名球員均為越南國家隊成員，但認為臨場發揮最重要：「我諗反而係唔好諗咁多呢啲嘢，用返我哋嘅心態就好。我唔敢話無嘢係無可能，但淨係知道，如果我哋團結踢一場波，知道係硬仗咁準備好自己，就無乜嘢問題。就算攞唔到要攞嘅分數，都要話俾人聽，我哋係諗住贏。」

在過去幾年，陳肇鈞一直隨港隊南征北討，對於在外地作賽已沒有太大感受，最想的還是感謝球迷支持：「落咁大雨都嚟支持我哋，我會睇到大埔呢兩年建立咗一種力量，呢種力量由堅Sir、球迷同老闆一齊建立，佢哋嚟到更會出多一分力。」


大埔會長葉吳彬彬、副主席兼領隊葉志雄傍晚亦到達酒店，與一眾大埔職員及球迷拍照

陳肇鈞最後再次感謝球迷，苦笑說球迷亦受暴雨影響：「真係好多謝佢哋冒住危險都嚟，希望值回票價，睇到我哋搏命去踢啦。」他認為賽事安排在周四舉行，球迷要請假更不容易：「國際賽係難啲，盡力做啦！」

版權: 
禁止衍生