【獨媒報導】港隊周日晚上於省港盃首回合2：2賽和廣東，梁諾恆相隔逾兩年再次代表港隊出賽，出任中堅踢足全場。他賽後表示很開心再代表香港，認為自己表現中規中矩，但遺憾最終未能贏波。現年31歲的梁諾恆已效力中超浙江隊4年，今季約滿離隊。對於之後去向，他稱由於家人健康問題，所以希望尋覓一些較近香港的內地球會加盟，例如深圳或廣州等地方，「而家都接洽緊」，希望於元旦前有決定。

梁諾恆上次披起港隊球衣已經是2023年11月21日對土庫曼的世界盃外圍賽，當時主教練是安達臣，兩年過去安達臣與韋斯活已相繼離任，由盧比度任暫代主教練。對於「重返」港隊，「細佬」賽後向《獨媒》表示很開心再代表香港，但遺憾最終未能贏波：「希望第二回合可以重奪呢個盃返香港，因為都輸咗兩年。」他認為自己表現中規中矩，亦希望協其他後防球員：「即係唔係剩係顧自己，而係可以俾隊友更加多嘅幫助。」

稱備戰時間短促

談到主教練盧比度，他指雖然從未與對方合作，但認為他由球員到教練成績都有目共睹，對香港足球亦有一定了解，並指他備戰省港盃為「艱巨嘅工作」：「要喺好短時間裏面，真正練波可能係練咗兩日就準備呢個比賽，對所有教練同球員嚟講都係艱巨嘅挑戰。」他又希望球隊之後可以及時調整，「佢都擺咗好多idea俾我哋，但係礙於時間真係太短，我哋球員都需要時間消化，再去執行佢嘅指令」。

龐焯熙：享受球迷打氣聲

首次代表大港腳上陣的門將龐焯熙就稱：「初頭踢之前都有啲（緊張），但係其實落到場聽到球迷啲打氣聲，自己都好enjoy。」他認為自己集中力不足，亦未回復手術前的狀態，多方面仍需改善。對於暫代主教練盧比度，他就指：「佢講嘅嘢都幾清晰，不過始終今次準備時間唔係好足夠，所以我諗要做得晒佢講嘅嘢有啲困難。」

李家豪：行出場起晒雞皮 自評表現50分

同樣首次代表港隊出場的李家豪就表示非常榮幸：「尤其係呢個時期，我諗球員代表自己地方比賽係無比榮譽，嗰種榮譽感好難有其他嘢俾到。」他又指現時港隊不少人支持：「嗰種感覺行出場我係起晒雞皮，聽到個感覺好正。」

被問到如何評價今場表現，他自評50分：「發揮得唔算係自己好嘅一面，咁就又唔係話好差，但係我自己係可以練好攻守方面。」對於盧比度的執教方式，他認為每個教練都有各自風格，盧比度說話比較仔細：「始終西班牙教練風格好仔細，都好多想由後場build up，冇話好唔好嘅，睇吓係咪啱香港嘅球員，不過我諗都啱嘅，咁我哋唔算好高大，我哋唔係體力上比較靈活，咁能力上都幾啱。」

版權: 
禁止衍生