【亞冠二】接應回傳後被指踢對手輸十二碼 葉鴻輝：我保護自己咋喎
【獨媒報導】東方晚上主場出戰亞冠二分組賽以1：2不敵卡雅，來自伊拉克的球證尤錫夫執法備受爭議，其中爭議包括東方守門員葉鴻輝在接應回傳後，被指撞向對手輸十二碼。《獨媒》問葉鴻輝「有無嬲到想講粗口」，他表示「講咗啦」：「球證喺場入面就主宰咗比賽。」葉鴻輝稱球證當時指其踢向對手，自己已即時表示：「我保護自己咋喎，我咁咋喎，直程郁都無郁過！」
在賽後記者會上，卡雅主教練星出悠與今場最佳球員堀越大蔵出席，二人笑容燦爛。星出悠稱對球隊終於贏波，取得今屆賽事的首個三分，感到非常高興，大讚球隊表現很好。
堀越大蔵同表示，對為球隊贏得三分感到高興。被問到在上半場遭葉鴻輝侵犯，令球隊獲得十二碼的具體情況，堀越大蔵就笑稱：「我感覺到係佢撞我。」
盧比度：我哋喺佢哋主場開心，佢哋喺我哋主場開心
至於落敗的東方，主教練盧比度就恭喜對手，指對方十分硬淨：「我哋喺佢哋主場開心，佢哋喺我哋主場開心。」對於輸的兩球十二碼，盧比度顯得不願置評：「我哋無VAR，我會尊重球證嘅判決。」他引述葉鴻輝稱，當時只是保護自己，惟再三強調不會評論球證的執法：「評論球證執法唔係我嘅工作一部分。」
盧比度最後表示，不會為球隊的表現感到失望：「有時足球就係咁，星期日我哋有另一場波，休息、復原，再好好比賽吧！」
葉鴻輝：如果呢球咁都十二碼，我相信一年入面有好多都十二碼
在賽後混合採訪區，多名記者亦追問葉鴻輝對該球十二碼的看法，他先反問記者：「你哋覺得點呀！」葉鴻輝強調，當時並非其伸腳踢，而是對方衝向自己：「如果呢球咁都十二碼，我相信一年入面有好多都十二碼。」
另外，葉鴻輝承認，球隊在先輸十二碼落後一球下，表現亦欠佳，「所以更加影響到我哋」。被問踢多一人而再輸十二碼，葉鴻輝稱球隊希望能反勝，所以大舉壓前，後防有空位導致對手有機可乘：「我都唔係太清楚，但『黃梓』應該無觸碰到佢，但球證好快就吹十二碼。反而我哋喺對面禁區被人攬跌，球證就無表示。」