【叱咤2024】鄭秀文奪我最喜愛女歌手 勉年輕歌手逆境中堅持：深信會青出於藍勝於藍
（獨媒報導）2024年度叱咤樂壇流行榜頒獎典禮周三（1月1日）晚在亞博舉行。鄭秀文時隔奪得24年奪得叱咤樂壇我最喜愛的女歌手獎，她在台上勉勵年輕歌手要堅持自己所相信的，「我好深信，我亦都好渴望呢一代歌手會比我哋呢一代歌手會做得更加好，青出於藍勝於藍」。同時獲得叱咤男歌手及唱作人金獎的陳卓賢（Ian）就感謝前輩張敬軒，指對方兩年前曾將自己的獎座交給他並說：「你擺喺屋企，我相信你有一日會攞到，攞到嘅時候你將呢一個畀返我 」。陳卓賢領獎後對張敬軒說： 「 我今晚返去就即刻攞返去畀你。」
多名台下歌手站起拍掌恭喜鄭秀文。
鄭秀文久違現身頒獎禮 穿24年前登台服感謝樂迷
叱咤樂壇我最喜愛的女歌手獎由鄭秀文奪得，這亦是她第四度獲此獎，成為史上獲得此獎最多次的女歌手之一。她對上一次出席叱咤頒獎禮是2001年，事隔24年，她今晚一邊唱出獲2019年至尊歌曲大獎的〈我們都是這樣長大的〉，一邊從觀眾席走到台上領獎，並笑言「有啲歌手仲未出世，有啲人仲喺阿媽嗰肚裏面」 。
鄭秀文說今晚對她的意義重大，特意穿回她在2000年奪得我最喜愛女歌手時的衣服，即鮮紅色外套：「雖然嚟到今日，呢件衫唔係最光鮮、唔係最靚，我頭先熨嚟熨去佢都好巢、好皺，但係對於我嚟講，佢係充滿著住我和歌迷嘅情感，同埋我對叱咤樂壇嘅一份情懷，所以我決定一定要着呢件衫上呢一個舞台。」
她坦言， 當商台通知其得到此獎項的時候感到榮幸之餘，亦有懷疑，「有啲唔知自己應唔應該嚟」，因她過往二十多年來都沒站在頒獎台上，認為這個年紀再出席頒獎禮很尷尬和格格不入。但她心念一轉，「音樂嘅存在本身就係讓人同人有更好嘅溝通，音樂本身就係一個打破隔閡嘅最好語言」，故決定坦然站在這個舞台接受獎項。
鄭秀文親自在台上感謝每位有份投票的人，「多謝你哋，係你哋每一位手上嘅神聖一票，係你們，係你哋彰顯投票嘅意義同價值」。她表示，在過往的時間沒有停頓下來，仍堅持自己所想，走自己的路，但從未想過能走多遠，「有時當你帶住自己嘅信心，帶住自己嘅堅持同勇氣，你條人生嘅道路自然會行出來。」
她亦勉勵台下的歌手，「無論你而家身處咩光景、無論你係順境、逆境都好， 你繼續帶住呢份嘅堅持，你所相信嘅會將你帶到好遠嘅道路，甚至飛得好高、好遠。我好深信，我亦都好渴望呢一代歌手會比我哋呢一代歌手會做得更加好，青出於藍勝於藍」，並藉此寄語年輕的歌手：「希望當台下嘅年輕歌手有一日嚟到我呢個年紀嘅時候，都一樣可以企上呢個舞台去鼓勵返你哋下一代嘅歌手，讓香港樂壇、讓音樂可以薪火相傳、傳承落去。」
事隔24年再奪我最喜愛的女歌手，她最後十分感觸，「好多謝隔咗24年香港樂壇依然記得我、依然認可我、依然喜愛我」再次感謝每位投票的朋友，笑指「容許我任性少少，以我呢個年紀，我今次嚟攞咗其實我好chill 好relax，冇乜嘢下年要冧莊或者要再入圍嗰種壓力，完全冇」，並請求在場觀眾呼叫她的中文全名，「係你哋成就咗呢個咁超乎想像嘅晚上！」
陳卓賢獲叱咤男歌手、唱作人金獎 台上感謝張敬軒
陳卓賢（Ian）首度同時獲得叱咤男歌手及唱作人金獎。他形容自己「心跳好快，好耐未試過心跳咁快，一片空白」。陳在台上特別向前輩張敬軒致謝，指張在2022年獲得叱咤男歌手金獎後，將獎項交給他作勉勵，並對他說：「你擺喺屋企，我相信你有一日會攞到，攞到嘅時候你將呢一個畀返我 」。陳卓賢領獎後便對張敬軒說： 「 我今晚返去就即刻攞返去畀你。」
陳又說兩個獎頂的份量很重，所以更加要做好自己要做的事，並感謝商台、所屬公司的同事、Mirror、以及過往一年跟他合作過的音樂人等。台下的張敬軒微笑拍掌恭喜Ian，知名「hellosss」、新任文化體育及旅遊局局長羅淑佩亦在台下觀眾席上，並對鏡頭露齒笑。
黃偉文再獲填詞人大獎：廣東歌萬歲！
黃偉文再次獲得填詞人大獎，近年移居英國的他一如既往以視像形式現身，第四度遙距領取獎項。黃先形容 2024年為「過得好幸運嘅一年」，因其歌曲得到叱咤DJ 的喜愛，並有不俗的播放率，故他感謝叱咤903、所合作的歌手、唱片公司及監製。
黃在片中表示「唔一定要再攞呢個獎」，因自己到達人生此階段，所追求的已不是播放率，反而為「繼續寫，寫得好啲，寫得再有趣啲，同埋繼續寫到大家有共鳴嘅作品。」他說，即使未來不再出現在頒獎禮之中，他仍會繼續為廣東話付出，「就算我喺台下或者遙遠嘅地方，我應承大家我都會攞曬自己出來，貢獻俾我心愛嘅廣東歌，除非有一日，大家已經唔再睇得出我寫出嚟嘅嘢同其他人有啲咩分別，除非有一日大家唔要我。」
他最後亦說，即使未來或不再獲獎，仍希望其作品能繼續在頒獎禮出現，「因為至少喺呢度，我嗰名係可以喺嗰字幕上面出現。大家好，我係其中一個心愛香港嘅廣東歌填詞人，我嗰名叫做黃偉文。祝大家新年進步！身體健康！廣東歌萬歲！」
〈至少做一件離譜的事〉奪十大第五位 Kiri T台上感觸淚流不止 全場幫手大合唱
Kiri T的〈至少做一件離譜的事〉獲專業推介叱咤十大第五位，為她首個的叱咤十大獎項。Kiri T在台上激動落淚，「講咗今日唔會喊㗎，I’m so sorry.」，並哽咽感謝叱咤903、為此曲填詞的黃偉文、與她一同作曲的J.Arie和Gavin Chan、其所屬的唱片公司華納等。
音樂響起時，她仍忍不住眼淚，一度未能獻唱，「原來真係會好感動㗎上呢個台。」她問台下：「你哋識唱㗎呵？」歌手和觀眾遂「幫手」一同大合唱。
Kiri T在14歲時寫下第一首音樂作品，即容祖兒的《兩面》。之後，她簽約了何韻詩的唱片公司Goomusic，開始當幕後作曲人，亦曾當獨立創作歌手，主力唱英文歌，至2022年加入華納唱片後，開始發行廣東歌。
林海峰唱改詞版南音頒新人獎
以往頒發「我最喜愛歌手」的林海峰，今年改為頒發新人獎。他笑言「唔好同樂壇咁脫節，（自己）年紀太大」，並對新人說可稱其為「林海峰叔叔」或「Uncle Jan」，又自嘲「我要扮吓後生先，yoyoyo， make some noise，hey yo，what’s up? 」
他在頒獎前又模仿電影《破‧地獄》中的黃子華和許冠文，清唱出「改詞版」南音：「涼風有信，秋月無邊，邊度有新人，邊度就有新希望，新年新鋪新經濟，新歌新戲新紀錄，理得你陳李張黃，定係姓何，你同我柒新歌，個個Baby face點會冇市場，就算首歌幾咁，幾咁，淒涼，都祝君新年快樂！」
2024年度叱咤樂壇流行榜頒獎典禮完整得獎名單：
叱咤樂壇我最喜愛的男歌手：姜濤
叱咤樂壇我最喜愛的女歌手：鄭秀文
叱咤樂壇我最喜愛的組合：MIRROR
叱咤樂壇我最喜愛的歌曲大獎：《好得太過份》 （ 姜濤）
叱咤樂壇男歌手
金獎：陳卓賢
銀獎：馮允謙
銅獎：林家謙
叱咤樂壇女歌手
金獎：Gin Lee
銀獎：JACE 陳凱詠
銅獎：雲浩影
叱咤樂壇組合
金獎：Dear Jane
銀獎：COLLAR
銅獎：雷同二友
叱咤樂壇唱作人
金獎：陳卓賢
銀獎：馮允謙
銅獎：林家謙
叱咤樂壇至尊唱片大獎：陳卓賢《Interlude》
叱咤樂壇作曲人大獎：林家謙
叱咤樂壇填詞人大獎：黃偉文
叱咤樂壇編曲人大獎：黃兆銘
叱咤樂壇監製大獎：陳考威
專業推介叱咤十大：
至尊歌曲大獎：〈會再見的〉馮允謙
第二位：〈間歇性休眠〉JACE 陳凱詠
第三位：〈九秒九〉容祖兒
第四位：〈回憶半分鐘〉雲浩影
第五位：〈至少做一件離譜的事〉Kiri T
第六位：〈藝術與科學 - FROM THE FIRST TAKE〉林奕匡/黃妍/葉巧琳
第七位：〈黑玻璃〉洪嘉豪
第八位：〈Hey Hey OK!〉盧瀚霆
第九位：〈戀愛腦之死〉陳健安
第十位：〈小心碰頭〉MC 張天賦
叱咤樂壇生力軍男歌手
金獎：Arvin 曾傲棐
銀獎：Teddy Fan
銅獎：CotaBoii
叱咤樂壇生力軍女歌手
金獎：林愷玲
銀獎：Winky 黃健怡
銅獎：Sumling 李芯駖
叱咤樂壇生力軍組合
金獎：VIVA
銀獎：ROVER
銅獎：OneUp