【獨媒報導】港超聯周日晚上於旺角場上演榜首大戰，共有2,455名觀眾入場創下今季新高紀錄，最終大埔領先兩球下遭東方追平成3：3，仍然領先4分但踢多一場。對於被對手連追兩球，大埔主教練李志堅就坦言：「踢波就係咁，東方無端端都和咗港會，點解呢？利物浦都失分又點解呢？英超可以失分，港超Big 4唔可以失分？係咪太大要求？」他認為球隊取得一分「唔係最壞」，強調球隊在爭標路上仍有主導權及優勢。

大埔賽前以44分暫列榜首，今場用盡6個外援名額，包括馬卡雷拿、盧卡斯、伊高沙托尼、帕特華維迪、加比爾及韋法頓。陳肇鈞、羅振庭及李家豪同任正選，奇雲莫雷拉先列後備，奇雲巴迪與峇夏比不入名單。

落後4分的東方與上場聯賽比較有兩個調動，由隊長梁振邦取代賓紀文任正選，拿亞因累積5張黃牌需停賽，由卡路士任中堅，與賀爾、米祖域及亞歷斯祖組成四人防線。前線攻堅為巴科爾、費利蒲薩及馬希偉，顧斌作後備。

盧卡斯6分鐘內梅開二度

上半場主隊東方先開波，開波僅僅2分鐘，賀爾回傳失誤，「助攻」盧卡斯單刀冷靜射入，為大埔閃電開紀錄。6分鐘，大埔右路獲得罰球，伊高沙托尼斬入禁區，盧卡斯無人看管下頂入成2：0。

20分鐘，大埔前場逼搶令東方失誤，盧卡斯左路偷波後，壓過梁冠聰禁區內施射，葉鴻輝擋出，米祖域加一腳但解圍不遠，陳肇鈞禁區頂補射高出。東方調整後搶回不少攻勢，31分鐘，賀爾將功補過，禁區外放冷箭，皮球直飛上角入網，為東方追近至1：2，這亦是半場比分。

創今季入場人數紀錄 東方下半場連追兩球

換邊後49分鐘，巴科爾禁區內接應長傳，但未能踢中皮球，遭謝家榮沒收。隊長加比爾示意謝家榮應提早出迎，後者喝斥「Shut up!」54分鐘，馬卡雷拿右路突破交橫，陳肇鈞再分予左路，伊高沙托尼睇到定射遠柱，大埔擴大比分至3：1。

57分鐘，東方收起梁冠聰，換入賓紀文。60分鐘，亞歷斯祖擺脫帕特華維迪底線傳中，馬希偉門前撞入，追近至2：3。大埔之後收起盧卡斯，換入奇雲莫雷拉；東方亦由林衍廷及顧斌入替馬希偉與卡路士。

78分鐘，謝家榮出迎阻截東方傳中，與巴科爾碰撞，後者一度倒地不起。謝家榮指罵對方衝門在先，並與東方後備球員洛迪古斯口角。81分鐘，馬卡雷拿禁區內從後撞跌亞歷斯祖，球證黃偉倫直指十二碼點。巴科爾不負眾望一射中鵠，扳平成3：3，掀起全場高潮。雙方之後再無紀錄，各得一分。

今場入場人數為2,455人，創本季聯賽最多入場人數紀錄，亞歷斯祖則當選今場賽事全場最佳球員。

李志堅：港超Big 4唔可以失分？

賽後大埔仍然以45分排榜首，不過踢多一場，東方及理文同樣落後4分。大埔主教練李志堅賽後表示，球隊在分數上仍有優勢及主動權，加上對賽理文三戰全勝，「簡單啲講，自己贏晒就得啦，唔洗理人嘅。」被問到領先兩球下遭逼和的原因，李志堅就稱：「點解？呢個足球比賽係咁㗎喎，你可以入人波，人哋都可以入你波。」他強調今日結果「唔係最壞」，贏輸亦不能代表聯賽冠軍誰屬：「踢波就係咁，東方無端端都和咗港會，點解呢？利物浦都失分又點解呢？英超可以失分，港超Big 4唔可以失分？係咪太大要求？」

質疑球證未有翻看VAR

對於球隊末段被罰十二碼，李志堅就認為亞歷斯祖有放大動作，認為球證可以翻查VAR檢視判決：「我都好難理解佢用咩準則去check VAR，咁緊張嘅比賽，反而你唔去睇吓？講緊係爭緊冠軍嘅聯賽。Anyways，都係足球一部分啦 」大埔本周將要先後出戰菁英盃及足總盃準決賽，李志堅坦言球隊受傷患困擾，感謝盧卡斯、韋法頓、馬卡雷拿等人拼盡全力，奈何球隊後備兵源不足，「我都唔知過唔過到，你睇我啲人五癆七傷啦，我都唔知點算，盡力爭啦。」

門將謝家榮對未能全取三分感到可惜，強調東方從來都不易應付：「我哋贏唔到有啲唔好彩，唔輸都有啲運氣。」他又為今場較勞氣解釋：「其實不嬲都勞氣，自己都好想贏呢場波，好有火，加上受球迷影響。作為龍門我俾人衝門幾次，點都要企硬啲，好似上季咁，俾巴科爾踢爆個頭咁滯，保護自己都正常。」

版權: 
禁止衍生