【獨媒報導】足總盃四強今日在旺角場上演，爭取衛冕的東方在法定時間與大埔踢成1：1，在加時憑巴科爾射入十二碼，最終以2：1贏波，將與標準流浪爭奪冠軍。大埔則繼周三在菁英盃四強出局後，一周內在兩項盃賽四強出局，大埔主教練李志堅在賽後感到失望。有記者問李志堅：「一個禮拜內輸咗兩個四強，呢個結果會唔會好傷士氣？」李志堅聞言後有點激動，反問「點解成日問呢啲問題呢」：「球員係人嚟嘅，教練都係人嚟嘅，會有感受嘅，我哋唯有向前看，我哋仲有好大機會爭聯賽冠軍，呢個係而家應該要做嘅嘢。」

兩隊均力爭成為雙料冠軍，大埔今場受傷兵困擾，馮冠鳴、羅振庭正選上場，盧卡斯、陳肇鈞受傷不入比賽名單。東方同盡用6個外援名額，隊長梁振邦正選登場，巴科爾、巴杜姆聯手攻堅，賓紀文先任後備。

巴科爾先開紀錄 馬卡雷拿半場前追平

上半場初段，兩隊均處於試探階段，13分鐘，帕特華維迪左路出波，馬卡雷拿後上起腳，葉鴻輝用腳擋出。20分鐘，馬高斯斜傳，巴科爾勉強起腳高出。戰至28分鐘，梁冠聰左腳送前，巴科爾力壓加比爾射入，後者失重心倒地，謝家榮欲救無從，東方領先1：0。在視像助理裁判覆核後，裁定入球有效，加比爾向球證庾建峯表示不滿。

在上半場補時階段，帕特華維迪放冷箭，但未能考驗葉鴻輝。不過，李家豪及後右路出波，馬卡雷拿門前掃把腳射入，在完半場前替「綠戰士」追成1：1。

多名球員受傷 伊高沙托尼傷出

下半場換邊後，東方加強攻勢，換入賓紀文，收起梁冠聰。50分鐘，賓紀文左路開角球，巴科爾搶點攻門，謝家榮又救到。61分鐘，伊達里奧禁區頂推順起腳，但未能命足目標。63分鐘，東方收起疑似有傷米祖掝，派出費利蒲薩。

72分鐘，伊高沙托尼推入禁區，扭過梁振邦再起腳，葉鴻輝沒收皮球。伊高沙托尼及後示意受傷要換出，大埔換入鍾偉強，東方亦收起巴杜姆，換入林衍廷。

東方末段主攻 兩隊下半場零入球

在下半場末段，東方取回不少攻勢，大埔採取防守反擊。78分鐘，大埔派出奇雲莫雷拉，收起羅振庭，並將杜國榆推上一格出任防守中場。

82分鐘，馬高斯操刀罰球，但省中對手出界。83分鐘，大埔收起帕特華維迪，換出李樂謙，場內只餘下5名援。在下半場補時階段，賓紀文又傷出，東方換入洛迪古斯，兩隊最終在下半場互交白卷，法定時間踢成1：1。

奇雲莫雷拉犯天條 東方十二碼取勝

在加時上半場，兩隊均體力下降，102分鐘，馬卡雷拿策動攻勢傳予伊達里奧，後者轉身起腳射斜。戰至107分鐘，馬高斯禁區內出波，奇雲莫雷拉在落地的時候，手部觸及皮球，球證庾建峯直指十二碼。巴科爾操刀射入，東方以2：1領先，這同是今場的最終比分，巴科爾成為今場最佳球員。

今場入場人數為2,193人，港隊主教練韋斯活、足總技術總監莫寧都有入場觀戰。另外，在比賽開始前，旺角大球場發生困𨋢，有記者及足總職員被困。

李志堅：我哋盡咗力 嘆大埔VAR 無著數

在比賽後，大埔主教練李志堅對記者稱感到失望，認為「我哋盡咗力」、「都無辦法」：「有可以用嘅人用咗，你見到中段幾個球員都傷，我覺得無辦法。」他又慨嘆「去到兩個盃賽都係被人十二碼」：「嗯，我覺得就無辦法啦。」

談到首個失球，李志堅亦有點意見，強調並未翻看慢鏡，但認為「好似每一次個VAR我哋都係無著數」：「咁多場，係咪？聯賽，次次都係咁，無辦法，永遠都係咁，我好明白喺我哋立場，覺得係咪有啲嘢可以睇清楚呢，但每一次調返轉又好似唔係，唯有講係足球一部分。」

然而，李志堅指己隊多次機會都未能轉化成入球，葉鴻輝亦救出多個必入球：「踢波始終講入波你入唔到，人哋入咗，anyway咩方法啦，十二碼又係，乜都係。」

遭東網記者焫㷫 李志堅：點解成日問呢啲問題呢？

《東網》記者問李志堅：「一個禮拜內輸咗兩個四強，呢個結果會唔會好傷士氣？」李志堅聞言後有點激動：「點解成日問呢啲問題呢？我真係唔明白。好無呀？一個人，你覺得係點呢？」他強調「要向前看」：「球員係人嚟嘅，教練都係人嚟嘅，會有感受嘅，我哋唯有向前看，我哋仲有好大機會爭聯賽冠軍，呢個係而家應該要做嘅嘢。」

另一記者問李志堅，大埔目前有多名傷兵，如何爭奪港超聯冠軍。李志堅回應稱「都無辦法」，幸好有一星期可以休息，重申「踢波就係咁」：「一個球季三個人揸住拐杖，我都好少見。」他又認為，球隊已盡最大努力，「唔會開心㗎，但都要向前望，可以做就做咗」。

李志堅及後再回應東網記者，稱「而家唔會諗呢啲」：「而家係要爭冠軍嘅時候囉，唔係再講會唔會乜嘢囉，會唔會咁又點呢？我話人聽我好傷士氣？Sorry呀，我希望你明白，問嘅問題應該問得正常啲。」他最後稱「唔會開心」、「係會咁㗎」：「唔好expect 我可以笑住同你講嘢。」

盧比度讚大埔表現出色 批東方「其實唔值得贏波」

在贏波後，東方將是第九次殺入足總盃決賽，決賽5月31日在旺角大球場舉行。東方主教練盧比度則表示今場一如預期是硬仗，但對球隊表現感到不滿，指對手在周中激戰120分鐘，今場仍戰意澎湃，多名東方球員卻缺乏鬥志：「我哋其實唔值得贏波。」

盧比度更表示，如果在半場能夠「大規模換人」，希望能換出所有球員，批評球員未有盡全力作戰。然而，他認為「足球有時就係咁唔公平」、「今次就發生喺我哋身上」，重申大埔今場表現絕不失禮，更以「踢了一場好波」來形容對手。

被問到東方爭取來屆亞冠二資格的機會，盧比度仍謙稱，東方贏港超聯冠軍的機會較微，而足總盃的衛冕機會則是「一半一半」，與對手標準流浪一樣，「始終係一場過嘅決賽」。