近日，最炙手可熱嘅動物議題，非森蚺與兔仔莫屬。事關4月25日，有市民／兔友遊覽香港海洋公園展館期間，拍攝到一條森蚺正在吞食一隻兔仔。

有關注兔仔的動物組織隨即去信園方，質疑被吞兔仔是否為活體、牠生前有否受到虐待，並要求園方更改餵食時間，以免引起公眾不安。

網上議論紛紛，我略略節錄部分留言，內容如下：

＊「不如叫條蛇改食齋？」
＊「動保L食飽冇__痾！」
＊「蛇天生惡，唔應該展示，兔仔可愛咪偏心囉！」
＊「反對圈養？自己唔係圈養緊貓狗咩？」
＊「動物團體食唔食素先？」
＊「澳洲袋鼠畀人射殺，你哋有冇出聲？」

總而言之，唔少市民批評動物團體無理煽情，指責動保人士無事生非，當中好些兔友與蛇友互相指責，爭論不休。

若果你係帶住情緒、冇理據上嚟留言嘅話，建議你唔好太費神、浪費時間。不如試下由問題根源出發，思考一下背後嘅制度與倫理問題。

我亦想分享自己嘅睇法，期望大家可以諗得更深入、更廣闊。

香港海洋公園展示森蚺，係真正嘅保育同教育嗎？

森蚺屬於無危物種（而物種是否瀕危，與圈養是否合理其實無直接關係）。2011年，香港海洋公園由日本引入一條雌性森蚺，同年7月誕下33條幼蛇，當中31條在年內死亡。報道指死亡原因為「蛇麻病毒」感染（有可能係園區出現跨物種感染）。而呢種病毒，在野外森蚺身上幾乎從未見過，死亡率極高。

森蚺雖屬爬蟲類，但絕大部分時間棲身水中，生活極為隱蔽、低調。在人工環境下，活動空間受限，長期被玻璃展示、被打擾、被餵食，完全喪失牠原本天性。動物之所以為動物，必須生活在符合牠天性的環境中。圈養破壞咗呢種本質——動物進入海洋公園後，牠就唔再係動物，而係一件「展品」。

所以，有唔少市民同動物團體仍然認為，海洋公園從事保育與教育，呢個觀念其實係一個普遍且嚴重嘅誤解，因為園內動物物種繁多，case by case 有機會再同大家講解。

道德直覺與爭議的根本

科學上，森蚺下顎結構的確係為吞食大型獵物（如兔仔、老鼠、魚類）而設，係佢哋嘅天性。所謂「弱肉強食」，人類與動物之間的關係，唔止於此，更牽涉道德與倫理責任。

舉個例子：愈與我親近的動物，我們會特別關注，我們不會吃狗吃貓、更不忍心看到貓狗被丟進展館裏餵蛇，這就是純粹道德直覺。這種「道德直覺」無絕對標準，會隨文化、時代、經驗而變。但正因為如此，我哋更應該嘗試理解動物團體出發點——唔好讓動物本身的感受，消失喺爭議與情緒中。

如果你睇到這裏，我希望大家再想一想，如果沒有動物園、沒有海洋公園的存在，我們還有以上的爭論嗎？重點從來不是森蚺、不是兔仔、不是貓狗……而是我們應唔應該繼續支持動物園？

文： Roni Wong

Source 資料來源：

動物團體「兔盧」聲明
2011年海洋公園31條森蚺幼體死亡
海洋公園最新回應

5月即將迎來全球「Empty the Tanks」反圈養鯨豚/動物日。不論你選擇以乜形式參與，希望大家一齊用唔同方式，替動物發聲。