梁祖堯封劇帝 台上激動哭泣：我哋會堅持落去、冇嘢阻到我哋

（獨媒報導）劇協主辦的第33屆香港舞台劇獎頒獎禮，在不獲當局資助下順利舉行。其中，風車草劇團的《Di-Dar》成今屆大贏家，共獲9個獎項，包括大獎「最佳製作」。

演員梁祖堯憑《Di-Dar》奪得最佳男主角（喜劇/ 鬧劇）後哭泣，感謝團隊之餘更向劇界「示愛」：「我哋真係好愛好愛呢個行業，我哋行咗好多好多好困難嘅路，但係我哋會堅持落去，冇嘢阻到我哋！我哋想講嘅嘢，我哋會用智慧（去表達），我哋會繼續做，我哋會繼續努力，我哋會繼續去愛我哋嘅城市，我哋會繼續愛大家，I love you all！」

《Di-Dar》共獲7個獎項，包括最佳男主角（喜劇/ 鬧劇）、最佳女主角（喜劇/ 鬧劇）、最佳男配角（喜劇/ 鬧劇）、最佳填詞、最佳音響設計、最佳製作和年度優秀製作。梁祖堯在台上說，誰得獎也沒所謂，盼望劇界大家能繼續互相支持：「因為我哋有同一個理想。」

「做喜劇唔容易，努力係來自我哋好愛香港劇場」

《Di-Dar》是個喜劇，並即將重演。梁說：「世界好唔開心，做一個喜劇可以令大家都笑、大家開心啲，係好唔容易⋯⋯但我哋都嘗試去做。我哋風車草唔係好多資源或者好多sponsor 嘅劇團，但我哋好努力，我哋真係好努力。努力係來自我哋好愛香港劇場，我哋想講我哋想講嘅故仔⋯⋯希望大家繼續支持香港舞台劇作品，只要你哋繼續支持我哋，我哋會繼續講應該講嘅故事，多謝各位。」

葛民輝獲最佳男配 寄語後輩：條路愈難行，更加唔可以放棄

葛民輝憑《Di-Dar》飾演校長一角獲頒最佳男配角（喜劇/鬧劇），對於舞台有更多歡樂的喜劇出現，他坦言：「因為外面都好多哭哭啼啼啦，入到嚟（劇場）想紓緩吓，咁所以有啲部分係喜劇或者鬧劇，嘿！笑一笑，relax吓，都可以係一個選擇囉。」

他又預告，《Di-Dar》下次重演時，他因檔期問題需要卸任校長一職，又開玩笑指接任的校長名叫「秋生」：「可能加插人肉叉燒包，所以順道超渡佢哋。」至於岑珈其的角色亦會換由ERROR的肥仔出演。

對於劇協早前被藝發局終止資助的風波，葛民輝回應指：「我覺得做劇場嘅人好辛苦，喺背後無論成本、壓力，然後好似眾志成城、大家都好熱愛。咁人哋提名你，你都支持吓佢哋、觀摩吓囉。」

他又憶述上年得悉有關消息的時候：「我記得上年突然間話抽起、籌款，我仲有留意手機嗰度…… 大家好憂啊、好愁啊，不如盡量幫啦，唔好斷咗件事，難得，你睇今年幾開心，嚟到呢度，Woo！」他寄語後輩：「條路愈難行，更加唔可以放棄。我諗好多人都仲好支持。」

晴天林獲舞台劇獎「最佳填詞」：大癲，晴天林居然可以上台攞獎

經常將流行曲改詞來諷刺時弊的網絡創作歌手晴天林，選憑著《Di-Dar》勇奪「最佳填詞」。他領獎時先笑說：「大癲喎呢單嘢，晴天林居然可以上台攞獎。」他又說：「因為我每年都喺YouTube上自己搞個頒獎禮，然後自己頒獎俾自己嘅，呢個應該係一個正式嘅獎項，對我嚟講。」

晴天林感謝頒獎單位劇協：「有啲歌詞咒你去死、叫你去搞喪禮，係比較踩界嘅歌詞，接受同包容程度好高。」他亦多謝《Di-Dar》製作單位風車草劇團：「你哋係一個好大膽嘅團隊，將一個咁大膽嘅題材擺上舞台，我覺得你哋最大膽係搵我填詞，呢個係一個非常大膽嘅舉動。」他又說，希望自己之後可多參與電影、舞台劇的作品。

《Di-Dar》是晴天林首次首次參與的舞台劇作品。被問及靈感來源時，他笑言是「睇多啲地獄、幽默嘅嘢」，很快不消兩、三晚已經寫好《Di-Dar》所需的詞。

《Di-Dar》即將重演，晴說希望有所突破，用了差不多兩星期再填詞。對他來說，在任何地方也可以創作，例如行街或睡覺時，都可在腦裡創作，不需要手機或甚麼架步。