理文連續兩項盃賽屈居亞軍 李文恩：為自己嘅錯誤埋單
【獨媒報導】冠忠南區爆冷以4：0大勝理文，繼2022/23球季後，第二度贏得賽馬會菁英盃冠軍。在輸波後，理文會長李文恩認為對手決心較大、值得取勝，但對理文未能取得入球就稱「比較難睇啲囉」。《獨媒》問到，對理文今季繼高級組銀牌後，在第二項本地盃賽亦屈居亞軍，與預期是否有差距。李文恩再次承認，管理層今季決定錯誤，「唔係話一定要攞啲乜嘢」：「差少少就差少少，總係為自己嘅錯誤埋單。」
在今場輸波後，有理文球迷大叫「仲有聯賽呀」，為球隊打氣。李文恩亦到草地向朱兆基了解球隊情況，記者問到其感受。李文恩稱冠忠南區的決心較大，但認為「足球就係咁」：「一場過嘅比賽，一旦你落後緊，就壓上去攻，上半場好多機會，到下半場初頭又追唔返近啲，再俾人打反擊，足球就係咁。」
李文恩恭喜亞哥斯達 再次承認管理層今季決定錯誤
在今季餘下賽事，理文將如何調整？李文恩稱「無得執㗎」：「剩返四場聯賽，盡量打好自己先啦。」記者問到倒戈的亞哥斯達，今場表現較同出任防守中場的保利臣為佳，李文恩強調，保利臣今場被安排在較後位置、「唔同囉」：「我係相信返而家呢班球員嘅，Jona（亞哥斯達）今日表現咁好，好恭喜佢囉。」
《獨媒》問到，對理文今季繼高級組銀牌後，在第二項本地盃賽亦屈居亞軍，與預期是否有差距。李文恩再次承認，管理層今季決定錯誤，「唔係話一定要攞啲乜嘢」：「差少少就差少少，總係為自己嘅錯誤埋單。」他認為，球隊已能夠晉身兩項盃賽決賽，「唔可以算係一件好壞嘅事」：「當然暫時未有好結果啦，剩埋呢四場聯賽，希望可以順利取勝先。」
談來季「年輕化」 李文恩：盡量避免年紀過大嘅外援
有記者追問，理文如果未能衛冕聯賽冠軍，今季是否失敗的球季。李文恩再三認錯：「你無辦法㗎啦，你真係做錯咗嘢呀嘛。你要為錯誤而埋單，咁講，我梗係希望贏得聯賽冠軍啦，不過唔係我哋控制得到。首先我哋要控制得到，我哋都係下風嘅球會。如果大埔贏晒，都係大埔㗎係咪先？唔諗咁多㗎啦，希望呢四場盡咗力贏咗先。」
此外，李文恩再次談及理文來季安排，透露已進行組軍一段時間。《獨媒》問到其早前提及的年輕化，他表示「年輕化係一定」：「年輕化唔係代表我正選出4、5個U22，我唔係咁意思，點樣可以將經驗同年紀平衡呀。」他以季初加盟惟已解約的夏馬特為例子：「佢嚟到都34囉，我哋盡量避免年紀過大嘅外援，唔係一下子青春班嘅意思。」
朱兆基：我哋犯錯都幾傷 稱已預計有一場狀態下滑
理文今季成績反覆，多次令人大跌眼鏡。在3月底的港超聯賽事，理文竟以3：7慘敗予大埔，朱兆基當時指有球員表現洩氣。理文近日看似重上軌道，在上周的港超聯賽事擊敗東方，保持衛冕機會，今場又不敵冠忠南區。
暫代主教練朱兆基則表示，球隊今場在上半場15至20分鐘未能把握機會，對手就憑一次突擊機會入波：「最洩氣應該第二個波，自己一個犯錯咁樣⋯⋯好快⋯⋯。」他慨嘆，理文在決賽連失兩球，但卻未能把握入球機會，並接連中楣、遭護空門：「你問我，有好多嘢，已經係部署、球員發揮有嘅嘢裡面。」
然而，朱兆基承認，南區贏在成功把握反擊機會、「我哋犯錯都幾傷」。談到理文近日勢頭原本不錯，今場卻大敗收場，朱兆基認為「都有一場波會drop」：「調返轉講，可幸嘅咪，我哋喺盃賽，但係係Final。」
指球員上月已博盡 多人下半場末段體能下降
《獨媒》關注理文在餘下四場港超聯賽事，如何不反覆地完成比賽，朱兆基認為球員在4月已博命，指立花稜也、泰法蘇尼及杜度，在下半場末段的體能下降：「呢個月根本無停過，但有陣時Final裡面，我哋好難輪換得好多。」
對於在下半場末段才換入多名後備，朱兆基稱「我自己係好唔想換：「因為我唔想放棄呀嘛，even係4：0，但去到好尾都要接受，好難返到轉頭。」
U22球員成今場分野？ 朱兆基：滿意羅焯熙表現
菁英盃賽例規定，球隊必須派出3名U22球員，南區的趙聡悟今場入波兼成為星中之星。《獨媒》便再問朱兆基，兩隊U22球員是否成為今場的分野。朱兆基有一番見解，指周子謙的穩定性較羅焯熙、潘尚希為高，後者每當遇上考驗便輸波；羅焯熙在首20分鐘「OK嘅」，但心態在失球後未能調整：「好多時都信心無咗，你見攞波又有啲失⋯⋯比個波嘅判斷，跑返嚟嗰吓。」
至於南區的U22球員，朱兆基指趙聡悟是好球員，「容昊都係好啦，Sky（顏翱天）都係好OK」：「你問我如果位置上compare，Sohgo（趙聡悟）嘅優勢就係因為佢係順境，相比之下阿Mo（羅焯熙）睇落好似drop啲。」朱兆基最後表示，個人「幾滿意」羅焯熙的表現，但指對方要學習如何保持到尾。
朱兆基苦笑：踢得好啲嗰場就瀨嘢
此外，理文今場改以保利臣墜後踢防守中場，羅焯熙出任攻擊中場，或影響了球隊發揮。朱兆基承認，今場的確要遷就U22球員：「成隊咩人選都好，我覺得最尾 Final都係信佢哋，擺佢哋出去。」
朱兆基最後苦笑說，球隊在失球前，保利臣、黃威「成個中場都係攞晒」：「有陣時踢波就好得意，我都同啲教練團講，踢得好啲嗰場就瀨嘢。」他舉例稱，上場對東方「唔會咁樣踢」，但卻獲得想要的效果。