50名鴻星員工遭欠薪共600萬工會批集團濫用破欠基金「由政府出糧」

（獨媒報導）鴻星集團昨日突然宣布，位於旺角MOKO新世紀廣場的最後分店「鴻星海鮮酒家」即日結業，勞工處已接獲約50名員工求助，追討欠薪等約600萬元。中西飲食業職工會主席何仁清指，至今仍未聯絡到集團負責人，批評鴻星不負責任，並質疑鴻星「有預謀地」賺盡七一公眾假期的生意才突然結業，以及濫用破欠基金「由政府幫你出糧」。

鴻星拖欠個半月糧至今仍未找到負責人

中西飲食業職工會主席何仁清今早接受商台節目《在晴朗的一天出發》訪問，稱鴻星員工在7月1日放工後，晚上10時半收到上司通知，鴻星會於翌日結業，不過並無交代剩餘薪金和遣散費安排，工友們感到十分傍偟。工會昨日曾嘗試經勞工處聯絡集團負責人，但仍未聯絡到。

何仁清又指，鴻星上月已經拖延薪金兩星期，多數員工都認為公司未必會倒閉：「佢哋都有個感情，覺得唔緊要啦，差一兩個禮拜，同老闆共渡時艱啦，點知突然結業，都好無奈。」

資料圖片

批鴻星有預謀七一後即結業

何仁清直斥鴻星集團「不負責任」，未有及早通知服務多年的同事，工友因此「手停口停」。他同時質疑鴻星「有預謀地」賺盡七一公眾假期的生意，以及濫用破欠基金：「喺我哋工會角度，你係有預謀地做埋公眾假期，因為七一都比較忙，叫做比平日生意好少少。你做埋嗰日，夜晚就突然通知同事，等佢哋收工後先通知喎，你咁樣7月1日做完生意，7月2日就結業﹐咁你七一做生意嘅現金去咗邊呢？就係夜晚等工友收工，主管返去開夾萬攞晒啲現金，返寫字樓再通知工友聽日唔洗返。」

何仁清（右）圖片來源：中西飲食業職工會Facebook圖片

何仁清續指，大家都明白市場環境差，但強調並非不出糧的藉口，亦沒有理由利用破欠基金「由政府幫你出糧」。他表示相關操作近年十分常見，認為此等風氣不理想。

前員工稱餐飲市道差需思考「點保命」

人稱「詩姐」的鴻星中菜前高級營運經理郭雅詩在同一節目表示，自1995年入職鴻星，雖然集團2020年賣盤予「舖王」鄧成波時，她已經離職，但知得集團結業依舊十分傷感：「有份打呢個品牌，一粒粒石仔咁砌出嚟。」

她憶述起舊老闆何永年待客友善，同時勇於創新，在港帶起石頭魚、黃油蟹、盤菜等風潮，更辦過「黃蓉宴」、「風雲宴」和「三國宴」等主題宴會。「詩姐」認為當下餐飲業市道「好差」，業界要有危機感，勇於創新以保持吸引力，「唔係點賺錢，係點保命」。

「鴻星海鮮酒家」於1989年由何永年、鍾錫鴻、及大廚周權忠創立。曾經被日本報刊報導，亦曾經進軍日本，但眾分店相繼結業，2020年集團賣盤予「舖王」鄧成波。