【獨媒報導】東亞足球錦標賽決賽周在韓國龍仁市舉行，逾千名香港球迷遠征當地為港隊打氣，不少球迷都居住在首爾，寓旅行於睇波。一間位於首爾弘大站附近的咖啡店，獲香港球迷支持。該間名為Remind Coffee Seoul的咖啡店，更售賣凍檸茶及蛋撻。咖啡店由一對來自香港的夫婦主理，老闆Jacky 與老闆娘Venus 接受《獨媒》訪問，稱希望以凍檸茶及蛋撻，「用香港特色與附近社區打招呼」，這亦為他們帶來意外收穫，成功吸引附近學生、在韓工作港人光顧。

與港男交流咖啡心得 球迷推介迎來小陽春

老闆Jacky 還記得這一個畫面，那一夜已收拾好廚房，正要熄燈關門之際，看到有3名男子在店外：「唔知係咪球迷，但我見係香港人。每逢香港人我就會話你入嚟啦，咩都有！」那一夜，Jacky 和那3名香港男子暢談一番，他們不但是港隊球迷，更是咖啡迷，就咖啡交流了心得。


Jacky

球迷將Remind Coffee Seoul 推介到香港球迷的WhatsApp群組，頓時令這間咖啡店迎來小陽春，這實在令Jacky 始料不及：「點知嚟到都數以幾十計，覺得好warm。嗯，喺外國嘅香港人，有時會有啲孤單。」在訪問當日，記者甫進入咖啡店，店內已有不少香港球迷，多張枱上都有蛋撻、凍檸茶。

八十後的Jacky 原本在香港替一個咖啡品牌工作，3年前獲公司派駐韓國開分公司。他在數月前毅然辭職，決定與妻子Venus 在首爾弘大開咖啡店。

夫沖咖啡妻整甜品 開舖冀以啡會友

店舖名為「Remind Coffee Seoul」，Jacky 把概念娓娓道來，他在開業的時候多次問自己：「成日都問自己係咪真係要開？點解要開？想個名remind 到自己，我哋當初為甚麼要開一間咖啡店。」

不忘初心，方得始終。本身是咖啡愛好者的Jacky ，早已沖了十多年咖啡，妻子則愛整甜品，「我成日都諗呢個matching 幾好，我又做開品牌咖啡店，不如自己開一個品牌出嚟，又想同客人close 啲。」他希望能夠「以啡會友」，透過咖啡與附近的居民、旅客「做朋友」。

二人居住在首爾城東區的馬場洞，他們原計劃在洞內開設咖啡店，考慮到可用英語與旅客交流，最後選擇在位於麻浦區的弘大開店。Jacky認為，弘大有很多民宿、共居公寓，附近亦有不少留學生：「都同我哋幾match，融合咗多元文化。」

指韓國人視飲咖啡為「叉電」 弘大開業競爭大

有說「韓國人咖啡當水飲」、「韓國人一日飲幾杯咖啡」，事實上當地大街小巷，都有多間價格親民的連鎖咖啡店。Jacky 就認為韓國人視飲咖啡為「叉電」，店舖自5月至今，已感受到競爭很大，原來在店舖附近的3條街，已有15間咖啡店：「唔理係旅客，定係韓國客都有好多選擇。我哋無得淨係做單一產品，要考慮到唔同客源推出唔同產品。」

在開業兩個月來，Jacky 與妻子每日全勤，他指初時因為欠缺知名度，每日只能賣出十多杯咖啡，慢慢才累積客人，加上Google Maps reviews 吸引外國旅客。

韓國的香港蛋撻背後 食材成最大挑戰

咖啡店既售賣咖啡，亦有港式凍檸茶及蛋撻，這對夫婦的想法是：「既然我哋兩個香港人，想用香港特色同附近的人打招呼。」港式凍檸茶及蛋撻，為他們帶來意外收穫，吸引附近學生、在韓工作港人光顧，Jacky 想了想說：「好多人都話好似返到香港咁，解到鄉愁。」

老闆娘Venus 本身是辦公室上班一族，空閒的時候會整蛋糕，尤其忌廉蛋糕，蛋糕則是新嘗試。她指在韓國整蛋撻，食材是最大挑戰：「喺香港好容易搵嘅花奶，甚至雞蛋嘅品種，喺呢度比較難⋯⋯花奶都係自己溝出嚟。」


Venus

整叉燒回味香港味道 聽廣東歌解鄉愁

從花奶、天氣變化及蛋漿溫度，都影響蛋撻出爐的效果。在多次嘗試下，Venus 終於找到「與香港最相似的花奶」，成功在韓國整出香港蛋撻。她嘴角帶點微笑說：「好多客人食完都話係有香港味道，我都好開心嘅。」

人在外地，難免會想起故鄉的食物，Jacky 坦言「都想返香港食吓乾炒牛河」，每逢在店內認識到來自香港的客人，「都會問吓佢哋有無做得好嘅香港餐廳」。Venus 偶爾亦會整叉燒，並且炒餸煮飯，回味香港的味道。除了與家人視像通話，Jacky 亦會聽廣東歌紓解鄉愁：「收檔成日聽香港嘅歌，揸車都會聽吓。」

感恩一起闖出小天地 學韓文投入新生活

在Jacky 到了韓國發展後，Venus 在半年後都來到首爾，她感恩兩口子終於有機會，一起闖出小天地：「當有一個機會，唔需要話最啱嘅時候。機會喺你前面，你就去試。好似我哋有機會嚟到韓國，咁就試吓，輸咗唔緊要，輸咗咪從頭嚟過。」

要投入異地的新生活，學習語言自然必不可少。二人每周有四晚都會上網課，輪流學習韓文，另一人負責看舖。從學習新語言，Venus 認為的確少少辛苦：「始終第二種語言、文化都唔同，但生活到嘅！」

兩年後申請永久居留 盼咖啡店「可以生存得耐啲」

二人現時的簽證為長期居留，已計劃在韓國落地生根，將在兩年後申請永久居留。談到未來目標。Jacky 希望咖啡店「可以生存得耐啲」，他望著Venus 說：「等嚟首爾嘅客人都知道，一去嗰個位置，有兩個香港人係好friendly，好傾得計，想傾訴吓或者問吓嘢，啱啱移民過嚟，我哋都會喺度。Venus 亦對丈夫無限支持：「佢話走得幾遠就幾遠，我咪支持到佢有幾遠。」

在訪問尾聲，Jacky 還分享了一件事，一名不喝咖啡的香港人早前特地來光顧，買了數杯檸檬水：「佢令到我哋覺得，第時去旅行都要搵返啲香港人出嚟，幫返佢哋。」

版權: 
禁止衍生