【獨媒報導】效力大埔的港隊球員尼高拉斯，近日有傳獲內地球會相中，惟大埔索取高價轉會費並拒絕放人。大埔今早舉行新一季球季發佈會，球隊總監兼主教練李志堅主動為事件闢謠，指大埔至今未收到任何就尼高拉斯的轉會報價，呼籲外界不要向他給予壓力：「我都同佢講，日後有機會咪去囉，無機會咪俾心機踢，我都希望你幫到我啦，尤其是係今年有亞冠二。」

網上有謠言指，尼高拉斯獲內地球會相中，惟大埔索取高價轉會費並拒絕放人。在典禮開始前，李志堅已特地與尼高拉斯合照，並向記者稱「咩都唔洗講」、「有無笑，唔笑唔好出」。

季尾接高俊基電話稱有內地球會「有興趣」 尼高拉斯東亞錦期間向球會提免費轉會

在典禮結束後，李志堅亦與尼高拉斯見傳媒，為事件闢謠。他指在季後接獲深水埗總監高俊基的電話，問到如有內地球會對尼高拉斯「有興趣」，「大埔會唔會俾佢走」：「我哋當然願意啦，只要佢俾轉會費，梗係可以。」李志堅表示，尼高拉斯目前與大埔仍有一年合約，職業球會收取轉會費是正常不過的事，惟及後未有任何球會接觸大埔，以表達對尼高拉斯有興趣：「係完全無，一次都無。」

李志堅續提到，尼高拉斯在兩星期前即在韓國舉行的東亞足球錦標賽決賽周期間，向其發訊息感謝球會，「但想多啲機會踢」：「我梗係理解啦，不過佢問我可唔可以Free Transfer。呢個坦白講，我要同老闆傾，如果老闆同意咪都得，但之後呢個就無聯繫啦。」李志堅再三重申，從未有任何球會、中介人就尼高拉斯轉會聯絡大埔，「呢個事實嚟，你可以問返尼高拉斯」。

尼高拉斯返港後顯失落 李志堅：要求返轉會費都好合理

在最後，李志堅指尼高拉斯在返港後顯得失落，他則安慰對方：「如果真係有，你咪叫佢哋搵我哋，你話我哋講嗰個價錢好貴。其實就算係，佢覺得俾唔起，覺得唔值得俾，你咪講俾我聽幾多錢囉。我覺得好合理，講真嗰句，唔通我同你講2萬咩？唔通一開始話2皮，2皮搞掂？我覺得都唔respect 啦，一個國內球會嚟搵我哋香港球會、香港代表隊，我哋要求返轉會費都好合理。」

李志堅重申，假如內地球會不欲支付轉會費，亦可向大埔商討，強調大埔亦希望協助尼高拉斯：「再講，尼高拉斯係咪我唔用？梗係唔係啦！我搵得返嚟覺得有用。」他認為球員表現欠佳的時候，自然需要調整，指尼高拉斯是很有潛質的球員，但其性格不太會表達、「怕怕羞羞咁」，呼籲外界不要給予壓力：「我都同佢講，日後有機會咪去囉，無機會咪俾心機踢，我都希望你幫到我啦，尤其是係今年有亞冠二。」

李志堅強調要對事實說話 尼高拉斯承認「最後都無俾offer」

在尾聲的時候，李志堅強調要對事實說話：「佢本人喺度，你可以問吓佢，我有無講多，有無講錯，你講出嚟呀大佬呀！」這時候，在旁邊的尼高拉斯稱「你講嘅嘢都係true 啦」、「最後都無俾offer」。李志堅就指「你買嘢都問吓我啦大佬」：「唔通我自己走去話，尼高拉斯賣呀？」他最後表示，大埔獲不少有心人支持：「針對我本人就無辦法啦，但唔好搞到我球會、我啲球員。」

有記者問到，表示對尼高拉斯有興趣的球會屬中超或中甲，李志堅稱「我梗係唔知啦」：「淨係話國內，唔知係咪蘇超（江蘇省城市足球聯賽）呢。」

版權: 
禁止衍生