【獨媒報導】港超聯球隊標準流浪今早舉行開季拜神儀式，球隊今季有守門員艾力司（前譯：奧力斯）及盧兆崎離隊。秘書李輝立點名對二人感到十分失望，指早前入選港隊的艾力司，在續約時不但要求加薪五至六倍，更要合約訂明「一定要俾佢踢正選」，認為是不合理的要求。他又透露，艾力司在未有班落的情況下，曾經提出重返流浪：「返嚟𠼮我，我話唔要啦！我哋培養新人，俾啲細路仔踢啦。你都三十幾歲囉，你咪痴住香港隊個教練囉，佢睇你咪叫佢介紹球會俾你囉。」

流浪今早舉行開季拜神儀式，球員名單只有兩名守門員即陳冠燊及葉嘉宇。《獨媒》關注艾力司的去向，包括是否未獲流浪續約。李輝立就顯得有點勞氣，稱「我俾8年時間佢本地」，並指流浪主席莫文韜曾聯絡入境處協助處理入籍工作：「嘩，轉咗本地入選香港隊喎！我話我唔加意見啦，你係咪真係咁嘅能力入選香港隊，伍瑋謙唔好過你？」


資料圖片

稱艾力司早前欲重返流浪 李輝立：可考慮擔任訓練員

李輝立表示，艾力司早前向其稱有兩支本地球隊擬邀請加盟：「我話俾你呀，10間超聯包括甲組頂班嗰啲，暪唔過我呀！邊間搵貨，我知㗎嘛！海外又邊度搵你，咁OK啦，你自己搵囉。」他透露艾力司早前曾希望重返流浪：「返嚟𠼮我，我話唔要啦，我哋培養新人，俾啲細路仔踢啦。你都三十幾歲囉，你咪痴住香港隊個教練囉，佢睇你咪叫佢介紹球會俾你囉。」


資料圖片

《獨媒》追問艾力司要求的條件，李輝立指對方要求加薪五至六倍，他指艾力司「好少人工啫」：「嗰陣時你又唔係本地，1萬你叫到5萬，我會唔會俾你呀？仲要俾屋你住。」然而，李輝立認為最不合理的是，艾力司要求流浪「一定要俾佢踢正選」：「一個唔合理嘅條件，佢話我要踢香港隊，你場場一定要俾我踢正選。有高低㗎嘛，你狀態唔好我俾你踢正選？合約訂明踢正選，唔好傻啦！」他表示艾力司可考慮擔任流浪的訓練員：「但我唔會要你踢，幫手做訓練員。」


資料圖片

同對盧兆崎感失望 指對方拒聽莫耀強父子電話

除了艾力司，李輝立表明對已約滿轉投大埔的盧兆崎亦十分失望，指自16歲帶其出道，並透過不同途徑協助對方入讀香港大學：「今年一句聲都唔出，佢唔肯簽合約，我問佢要幾多錢，佢唔講。唔踢？踢邊度？你係咪唔踢波先，佢又唔講！」

在去季季尾，盧兆崎未有進入球隊比賽名單。李輝立表示，流浪隊長劉智樂、隊友包教練當時均曾作勸過盧兆崎：「莫生兩仔爺打電話唔聽！由佢囉，你唔聽我咪雪你囉！呢場我對東方爭冠軍我俾你踢呀？老實講，佢踢嗰場波可能唔使輸，輸個地波！」李輝立慨嘆，兩名守門員都令自己十分失望：「我哋無對佢唔好，無話感恩呀，你做人你讀書讀到咁，你應該好理解嘅。」


資料圖片

透露老闆對簽葉嘉宇有微言 強調不應有色眼鏡看待

在盧兆崎、艾力司離隊下，流浪簽入另一守門員葉嘉宇。葉嘉宇在2023年被指涉嫌在2021年強姦17歲女子罪成被判入獄5年3個月，他在今年2025年6月上訴得直，獲撤銷定罪及判刑。李輝立透露老闆初時表示反對：「我話後生仔，男女私情嘅嘢，我唔知佢點。做咗嘢唔曉得處理，咁可能係被人屈，但結果佢都係上訴成功，咁我哋唔能夠以有色眼鏡睇佢。」

李輝立認為葉嘉宇身形具優勢，「況且我哋無守門員呀嘛」：「當時真係得燊仔一個，咁點解唔俾機會佢呢？人哋點講，人哋把口講啫，我哋憑良心去做事。後生仔就算真係做錯嘢，佢偷呃拐騙就話啫，佢兒女私情處理得唔好啫，據我所知就。被人屈又好咩都好，經過一次教訓，況且佢都喺裡頭有讀書有進修，即係有悔意啦。」他坦言，葉嘉宇小時候不太壞，形容是「太過單純」。

去年外流泰國趙正宇仍未歸隊 李輝立：自己害自己

除了盧兆崎、艾力司，流浪還有另一名「失蹤人口」趙正宇。李輝立先提到，將加盟西班牙皇家足協丙級聯賽球會聖羅迪萊佩的18歲小將黃韜霖：「我同Vito講，你海外發展係好，人要求上進，呢度少機會踢，無條件放咗佢。但唔能夠過我一棟，返嚟踢其他球會就唔得，3年內，我希望你真係踢到名堂出嚟報答我。」

現年19歲的趙正宇去年外流泰國，加盟泰乙球隊BFB芭堤雅城，但上場機會不多，在今年1月因受傷腳踝韌帶撕裂並解約返港，其與流浪仍有2年合約。然而，今早的季前拜神儀式未見趙正宇的身影。李輝立表示，趙正宇外流泰國第三級聯賽球隊是「自己害自己」，透露此子今年2月曾返回流浪訓練：「我話返嚟啦乖乖地，你只有喺呢度先有希望。」

流浪今季不設主教練，續由教練團成員分擔工作。會長莫耀強表示，今季改任秘書的李輝立「退緊㗎啦」，但其對隊內的年輕人有不少意見。李輝立亦不諱言，球隊在行政安排上未完善，指今季教練團已有多名成員，黃展鴻將主力負責行政工作。

李輝立：個個為咗爭成績，就忽視咗個青訓

除此之外，流浪教練團成員潘文迪正考取亞洲足協專業級教練資格，李輝立亦「分享」指，有來自英國的足總高層與技術部人員「嘈到反轉」：「佢哋為咗搵食，但唔能夠太過霸權，我哋無功都有勞，嗰班教練幫助香港媽多，好似上Pro牌，你排斥晒佢哋，搵班鬼佬嚟上，等如香港隊選人一樣。」

談到培養年輕球員，李輝立認為最重要是培養本地年輕球員，慨嘆越南昔日實力不及香港，「嚟親都輸俾我哋」、「人哋肯用心去做」：「你傑志成班鬼佬過去，都唔夠佢踢。」李輝立希望，其他球隊能一起努力推動青訓，稱近年都是傑志與流浪爭奪青年聯賽冠軍：「U14、U16都全部我哋攞晒，其他球會都應該用心去做。超聯除咗東方做青訓做得幾好，其他唔見得邊幾隊係夠膽。個個為咗爭成績，就忽視咗個青訓囉！」

嘆每名教練起碼都三份工

對於去季新成立的U22聯賽，李輝立認為有助推動青訓，今季將更具競爭性，但他就反問：「大家係咪⋯⋯教練出嚟用心去教，用返自己本土教練？好似我哋一路都用劉智樂，成功呀攞冠軍呀U22。」

此外，流浪今季獲陳鴻平加盟出任球隊顧問，李輝立大讚對方十分有心得，希望能協助年輕球員成長：「而家老實講，每個教練你話喺度，係咪真係咁全心全力？每一個教練起碼都三份工，最少！青年隊、成人班，呢頭教完又趕去第班，有時教細路仔真係要有心機，完咗要喺場邊教、點樣改進，而家真係好難搵到專心做嘢。」

版權: 
禁止衍生