【獨媒報導】新一季港超聯下周開鑼，標準流浪今早舉行季前拜神儀式，球隊爭取進入爭標組，並以至少一項盃賽決賽為目標。流浪會長莫耀強提到，球隊今季班費與去季相約，同為900萬元。隊長劉智樂表示，今季目標是繼續打破由自己保持的華人球員入球記錄：「一年進步過一年，呢個係每個足球員應有嘅態度。」劉智樂又向《獨媒》透露，早前獲多於一支港超聯球隊垂青，在衡量流浪開出的條件、誠意後決定留隊。

標準流浪在去季港超聯以第七名完成賽事，並殺入足總盃決賽。梯隊亦取得好成績，除在U22聯賽贏得冠軍，U16、U14同贏得冠軍。在去季港超聯，劉智樂射入18球成為華人神射手，兼入選香港足球明星選舉最佳十一人，惟未獲港隊主教練韋斯活挑選進入球隊決選名單，不少球迷都為他發聲感到不值。


劉智樂

獲多於一支球隊垂青 劉智樂：流浪真係好過其他球會

劉智樂強調只會為球隊成績、個人成績表而行，「做好自己最緊要」，今季目標是繼續打破由自己保持的華人球員入球記錄：「一年進步過一年，呢個係每個足球員應有嘅態度。」流浪今季陣容亦迎來不少轉變，劉智樂稱已不是新鮮事，「最重要是有年輕球員不斷湧上嚟」。至於今季目標，劉智樂認為爭奪港超聯冠軍是天方夜譚：「但打入爭標組，接近中上游，就OK嘅。」

《獨媒》問到是否獲其他港超聯球隊相中，劉智樂確認獲多於一支球隊垂青，在衡量流浪開出的條件、誠意後決定留隊，「流浪真係好過其他球會」，加上與會長莫耀強、秘書李輝立多年來建立的感情：「如果唔係話好高人工，有啲咩吸引到我，都掹我唔走。」劉智樂又表示，流浪已為自己規劃日後安排，形容留隊十分安心：「同埋自己都32啦！唔係23，如果23我唔諗啦，就去第度啦。」


莫耀強（左一）

莫耀強指流浪與去季實力相若 欠中場分波球員

去季出任總幹事的李輝立，今季已轉任秘書，他早前表明將會退下來。莫耀強亦對記者稱「退緊㗎啦」：「佢老人家有少少覺得啲年輕人做得唔係咁好。你哋搵我講嘢，我都唔係好想講，教吓啲年青人講啦。我話你要包容吓啲後生仔啦，你唔好下下都話佢做得唔好，經驗唔夠一定係做得唔好，呢個係在所難免，希望佢包容多啲。」

談到球隊今季陣容，莫耀強指與去季實力相若，但尚欠一名中場分波的球員，又點名從大埔外借的馮冠鳴相當爛打，並指加納後衛阿博斯在昨日對東區友賽的表現不錯。有記者問到，為何未有留用去季從大埔外借加盟的比迪高，莫耀強就表示「我夠知阿媽係女人啦」：「有錢先得㗎嘛，我諗佢喺大埔都要過5萬蚊。我哋流浪不嬲慳慳地洗，啲錢太多我哋afford 唔起。」


莫文韜

去季U22球員上場時間逾5,000分鐘 莫文韜重申流浪著重青訓

流浪主席莫文韜則重申流浪十分著重青訓，去季U22球員上場時間逾5,000分鐘，較其他港超聯球隊的3,000分鐘為多：「即係話喺流浪踢波嘅青年人，係比平常嘅球員多35%機會上場，比最少嗰隊嚟講，我哋直程多三倍咁多，所以我哋係非常著重青訓。」

球隊贊助商、東瀛遊執行董事禤國全亦有出席，一眾標準流浪職球員身穿訓練球衣，心口只印有「標準錶針」。莫耀強要求職球員穿上印有「東瀛遊」字樣的球衣作拍照：「人哋東瀛遊今日嚟影相，上季嘅衫都要，即刻去攞！」

多名球員隨即返回球隊會所「攞衫」，由於流浪尚未印製新季球衣，一眾球員最後即場換上去季的球衣，與禤國全拍攝照片。黃展鴻對記者表示：「搞都搞唔切，今季好多球隊都係用Kelme 嘛，足總啲波又係用佢哋。」


禤國全（左一）

流浪續獲東瀛遊贊助 禤國全：年輕人繼續有追夢平台

在拜神切燒豬的時候，流浪一眾領導層大叫：「贏波！贏波！贏多啲波！」禤國全則向《獨媒》表示，今年已是連續第三季贊助流浪，贊助金額為數十萬元，希望「能出少少力」：「大家都知道搞波係無錢賺，大家一人出啲力，令到班主都可以積極。」

禤國全希望，透過贊助令年輕人繼續有追夢的平台，又表示已與莫耀強認識多年，今季繼續有默契地贊助球隊，「用個心去做」，將會抽時間入場為流浪打氣。


陳鴻平（左一）

陳鴻平任顧問 主力協助更正球員

流浪今季續由教練團處理日常訓練，及比賽的調兵遣將，成員包括黃展鴻、潘文迪、盧均宜、林嘉緯及張偉康等人。此外，去季季尾在理文榮休的陳鴻平，今季出任流浪顧問。陳鴻平透露獲李輝立邀請加盟，主力協助更正球員紀律、習慣及踢法。他表示，一眾球員十分年輕，而且態度積極：「錯誤當然有啦，理文都有錯誤啦，隊隊波都有錯誤，無十全十美，希望做到最好。」

在球隊角色上，陳鴻平稱和理文沒太大分別，強調「人鬼我都會指點佢」：「喺理文，啲鬼同我交情都好好。我話佢俾聽，你呢樣嘢唔係咁好，你要做，咁都聽我講㗎，我唔係挑剔佢，我想佢好咋。」

版權: 
禁止衍生