【獨媒報導】新一季港超聯即將開鑼，高力北區劍指殺入爭標組，隊長兼前鋒羅港威表示，今季最大目標是先協助球隊贏波：「反而入波呢啲就其次，我都想北區喺今年港超有好成績。」曾代表港隊上陣的羅港威表示，首先要自己踢得好，「港隊教練見到先會選你」：「我哋球會成績又唔係話好好啦，整體上發揮又唔係太好，希望今年可以⋯⋯如果有機會初選都好囉。」

羅港威今早代表球隊出席季前新聞發布會，同場還有昔日曾在深水埗合作，現任大埔主教練李志堅及同為「堅家軍」成員的陳肇鈞，三人在發布會前便寒暄一番。


資料圖片

今季續任中鋒 笑言有得踢就得

高力北區今季迎來頗大變動，羅港威向《獨媒》表示，個人目標是爭取正選，認為與隊友充滿良性競爭，希望能協助球隊贏波：「反而入波呢啲就其次，我都想北區喺今年港超有好成績。」

在陣容位置上，羅港威指去季季中起已擔任中鋒，今季會繼續專注在該位置，因為球隊兩翼有不少新球員，相信需要時間融入：「我就前中後你俾我踢都無乜所謂，總之有得踢就得。」

現年33歲的羅港威，曾先後效力南華、飛馬、東方及富力R&F等球隊，惟富力R&F在2020年10月解散，他在新冠疫情期間曾失業無班落。羅港威及後轉戰甲組聯賽球隊深水埗，並隨球隊升班港超聯，在前季轉投北區。

羅港威：嗰顆心仲喺度 將循教練方向發展

在去季賽事中，九龍城後衛曾錦濤亦獲港隊主教練韋斯活垂青，一度入選初選名單。羅港威亦曾代表港隊上陣，他表示首先要自己踢得好，「港隊教練見到先會選你」：「我哋球會成績又唔係話好好啦，整體上發揮又唔係太好，希望今年可以⋯⋯如果有機會初選都好囉。」不過，羅港威表明不會強求：「入到梗係好啦，足球員都係入咗入港隊出外比賽。」

昔日的「左羅」仍為不少球迷津津樂道，但對上一次穿上港隊球衣，已是2017年的事。因為羅港威不諱言「嗰顆心仲喺度」：「有！一定有！如果無，我唔踢波㗎啦。」他表示只要身體狀況許可，必定繼續踢職業足球：「無話期限嘅，你C朗都40啦！」此外，羅港威現時持有C級教練牌照，他表示會循教練方向發展。