兒時夢想設計巴士 前區議員轉職「揸巴士」
（獨媒報導）「最怕揸巴士，我寧願要設計巴士。」前葵青區議會副主席張文龍說。像許多巴士迷，兒時夢想是「揸巴士」。不過，由三歲起便是巴士迷的張文龍，抗拒長大後任職巴士司機，形容工作辛苦「勢死不做」，寧可設計巴士。
張文龍在學期間主修設計，2019年區選時以政治素人身份從政，四年前辭任「區佬」後，輾轉做過不同工作，半年前「誤打誤撞」下應徵巴士司機，一嚐坐上司機席的滋味，他說「揸巴士」就如親自展現香港特色——雙層巴士，並可以此標誌性地向外國朋友介紹自己是來自香港。
三歲做「巴膠」 兒時夢想是設計巴士
現年36歲的張文龍自小便成為巴士迷，兒時在家附近來往青衣碼頭及荃灣站的41M巴士線。某日該線突然引入空調巴士，令他刻骨銘心，自此開始研究巴士：「印象好深刻，因為全個青衣都無乜幾部冷氣車，嗰日突然之間有。」長大後回望，原來那時只有三歲，「三歲嗰陣原來已經留意巴士，嗰陣一路唔知我得三歲，所以真係由細個做『巴膠』做到大。」
背誦巴士型號、路線、車費對於張文龍來說已是「家常便飯」，閒時又會儲巴士書、去巴士展覽，年紀輕輕已成為人肉地圖，他笑言：「屋企人到我四、五歲嗰陣已經問：我要去邊到邊到，搭邊條線？跟住走嚟問我。」巴士吸引之處是甚麼？張文龍說：「以前九十年代巴士有好多唔同款，就算外表一樣，可能個引擎又唔同，總之可以好多嘢唔同，咁細個觀察到有呢啲唔同就發覺：原來呢樣嘢幾得意，所以就開始著迷。」張文龍說，即使父母並非巴士愛好者，但他們並沒有介意，甚至會陪他一起外出搭巴士，「你想去呀？一齊去啦！就咁樣掹住爹哋媽咪衫尾去睇巴士，所以呢樣都好多謝佢哋。」
1998年機場即將開幕時特意坐最新款巴士（受訪者提供）
不少巴士迷的兒時夢想是長大後投身巴士公司，但這名「巴膠」從小對任職巴士車長十分抗拒，他憶述年幼時曾有親戚對他說：「喂你咁鍾意呢樣嘢，不如大個去做巴士司機啦！」張文龍當時聞言即指：「千奇唔好、千奇唔好，最怕揸巴士，我寧願要設計巴士。」他說個人並不喜歡過著刻板生活，況且兒時當巴士迷便已瞭解到巴士行業的辛酸，「返早更要早過所有人開工，返夜更又要遲過所有人收工，如果唔係大家就正常時間無車搭。」
在學時期主修設計，張文龍說與巴士有關連，全因他的兒時夢想是「設計巴士」，「細個玩game會自己整啲3D model，去自己整啲巴士出嚟。」記者好奇問道他理想中巴士的模樣，張文龍緩緩地從袋中拿出手機，翻找著「咸豐年代」的相簿，隔了一會向記者展示，並咧嘴道：「細個畫嗰啲同依家街上面嗰啲真係差唔多！細個仲係熱狗年代，原來第時啲巴士真係咁嘅樣，不過自己無份設計咁解啫。」
小學時繪畫的中巴，長大後才知同款的ECW車身Olympian在中巴只有兩部（受訪者提供）
中學時設計的車身（受訪者提供）
中學時設計的車身（受訪者提供）
議員變車長 感受不同崗位工作
兒時勢死不做巴士司機，這名前「區佬」竟轉職成為巴士司機已有半年時間，現時主要駕駛九巴38號線。張文龍說，即使巴士司機工作辛苦，但自幼當巴士迷，都想一嚐坐上司機席的滋味，認為雙層巴士是香港一大特色，「揸住部巴士就好似親自展現香港特色咁，識外國朋友都可以有樣好標誌性嘅嘢嚟介紹自己嚟自香港。」
張文龍與38號巴士，是現時經常駕駛的巴士線。
不過他坦言任職車長只是純屬「巧合和偶然」。去年底外遊回港後，與同是巴士迷的朋友聚會，朋友當時笑言：「反正都搵工，不如試下入紙（應徵巴士司機），考咗車牌唔好嘥，回返本嘛。」當時，那位朋友更即場載了張文龍到巴士公司應徵。
由應徵、考車到首航，張文龍說以往「揸巴士」只會在打機時才會發生，在現實中首次載客時有一種「震嘅感覺」，他興奮地分享首航時心情：「終於掂得到部車，真係可以有機會可以鬧啲乘客啦！啫係唔一定鬧嘅，可以同啲乘客可以接觸，係開心事。」首航當日，甚至有朋友專程來找他，「沉寂咗好耐，無人理，無話風頭躉好耐，突然間有樣嘢吸引到啲朋友嚟搵我，始終可能做過『區佬』總係鍾意有人注目下你，係開心嘅。」
巴士司機向來被視為基層工作，工時長、人工微薄已非新鮮事。張文龍坦言任職巴士司機初期也會介意他人想法，曾有朋友得知他任職巴士司機後替他感到可惜，「喂！你以前係議員喎，識咁多嘢，你依家走去做咁基層工作？」不過，他反覺車長這個角色十分有趣：「普通人每人都有機會接觸到，但對呢個行業認識唔多嘅，所以好多時一講起：我做車長架！又會即刻變咗話題焦點，個個喺度盤問你，呢個位又幾有趣。」
張文龍開車前會先檢查車上的設備，倒後鏡等等。
張文龍指軚盤是「公家」的，所以為了保持乾淨，每次坐上駕駛座後第一件是必須是戴好手套。
張文龍指在完成每一趟工作後，車長需要巡視一次車輛，檢查有沒有乘客遺下的物品或者睡着的乘客。
放下「區佬」身份，張文龍做過不同工作，包括本地手工啤酒廠兼職、醫療儀器公司營業助理、網頁設計、現在是巴士司機，他說想涉獵不同工作，認為是對自己的一種幫助，「完咗（辭任）可能看似無可能嘅工作照做，有多啲感受去思考唔同人喺社會上面崗位係點嘅，就算依家都好，成日揸住部車我都會諗：如果第時我有得再做返嗰個崗位，做返議員又好，處理眼前見到社區問題會點樣好呢？咁依家多咗以前無機會接觸嘅經驗，調返轉日後有咁嘅機會可能係一種幫助。」
張文龍復刻當年競選宣傳品的照片
2019年區議會選舉宣傳照（受訪者提供）
張文龍復刻當年競選宣傳照片，當年的背景已經生滿雜草
唔一定做巴膠就係毒，做完巴膠令到自己唔毒都會
「巴士迷」常被戲稱為「巴膠」，一般帶貶意，皆因一些瘋狂「巴士迷」的行為常有爭議。張文龍則說不介意被稱呼為「巴膠」，在社交媒體上甚至用上「毒男巴膠」來自嘲一番，他笑言：「純粹有少少自嘲成分囉，同埋都幾得意嘅，比較大個先識我，可能做緊區議會已經係好多嘢講嗰陣識呢，佢哋未必會知『乜你咁毒架？』咁我特登寫出嚟，咪笑吓自己，係呀我係毒架，見到巴士會影架！順便笑吓自己年少嗰陣真係會咁癲架，我又未會傻到擺個雪糕筒阻人嘅，但係追住部車跑成公里，為咗影張相都會嘅。」
「我本身份人就有少少毒毒哋，比較內斂，但係巴士迷呢個興趣調返轉幫到自己，會識到其他巴士迷朋友，唔同巴士迷可能又有啲其他興趣，慢慢令到我個社交圈子擴展咗，所以唔一定做巴膠就係毒嘅，做完巴膠令到自己唔毒都會嘅。」
這名「巴膠」也有過很多瘋狂往事，例如在2008年12月7日，來往上水及佐敦匯翔道的九巴70號線，這條經典巴士迷「遊車河」路線最後一日營運，張文龍當時也有在場見證：「最瘋狂係70尾班車，最後嗰晚所有由10歲到20歲識嘅巴士迷全部都係哂度，好似大聚會咁，有啲可能退隱江湖好多年都喺度。因為條線好長途，仲要喺上水山旮旯地方，為咗追齊幾部最後一晚行嘅熱狗，特登計算好呢個站落完之後，駁程咩車，即刻趕去某個位再影，個晚凌晨都可以咁樣繼續追啲車，我自己都佩服自己。」
70路線最後一日（受訪者提供）
另一次是2012年5月8日，「熱狗」巴士退役前的最後一日。那天早上碰巧是學校考試，考試後又約了同學吃晚飯慶祝，惟張文龍心想見證「歷史時刻」：「我又好想見證歷史時刻，又係計算好準確啲時間，10點鐘內我一定要跑過去啦！跟住全日就考試，考完試同食晚飯有個空檔，我又特登走入去將軍澳，又出返嚟去食飯，之後又去趕埋尾班車，都係癲癲哋架！」
熱狗最後一日（受訪者提供）
熱狗最後一日（受訪者提供）
不過，自「熱狗」巴士退役後已甚少「追車」，張文龍笑言現時已變成「優雅的巴膠」，已沒有以往「追來追去」那樣瘋狂。
好好記住
2019年區議會選舉，張文龍以政治素人身份，組成「葵青傳承」參選，最終以3,711票成功擊敗民建聯羅競成，當選葵青區區議員（長安），其後更出任葵青區議會副主席。在此之前，這名政治素人曾在前東區民主派區議員古桂耀做過兩年議員助理，後來選擇出選屬於自己的選區，說是想「自己社區自己救」。
張文龍指對於長安邨平台有深刻的記憶，當年在平台拍攝競選宣傳照片。他憶述拍攝當年，這個平台公園有一個火車頭，如今已經不見了。
在葵聯邨公園，張文龍介紹以前葵盛東邨十二座拆卸後留下的部份。
他的政治啟蒙，也與巴士有關。九十年代，正值中英談判，主權移交前夕，張文龍說他小時侯已愛看新聞，留意政治人物和國際局勢。1992年8月6日，前港督彭定康到訪九巴沙田車廠，張文龍從新聞上看見前港督彭定康到巴士車廠參觀，印象深刻的是彭定康駕駛著一部特別型號巴士「丹尼士巨龍」，那時覺得「呢個人幾型喎！」：「細個嗰陣有次彭定康參觀巴士車廠，咁佢就揸住部巴士，細個就覺得：哇！原來做港督可以咁型！點解佢可以揸到嗰部咁特別嘅車架？所以印象好深刻。」這是他的政治啟蒙，誰料到長大後當選區議員。
談到政治啓蒙，張文龍憶述自己對於政治啓蒙或許亦與巴士有關。他回憶當年在電視看見彭定康駕駛丹尼士巨龍巴士，覺得原來政治人物可以「玩埋一份」，就慢慢開始有留意政治人物
2021年7月，宣布辭任區議員。回想起來，他說那時是不情願地辭任，仍有很多想做的事無法達成，而當時他研判實際上沒有辭任的必要性，惟身邊的人已紛紛離開，留下來變相已不太重要：「所有同事都走哂，辦事處同事又走，議會合作好嘅同事又走，嗰陣都會覺得自己好孤立無援，亦都覺得留喺到有啲雞肋。」
「21年有個諗法係好深刻，一定要好好記住19年到21年，呢段表現過大家自己社區可以自己救嘅記憶，留住係心入面，去到有咁嘅空間嘅時候，我相信啲人都仲會好想自己處理到自己社區事務。」
張文龍對於長安巴士總站特別有感情，除了以前曾經在這裏拍攝競選宣傳品，亦是當年區議員辦事處門外每日看着的風景。
2019年區議會選舉宣傳照（受訪者提供）
巴士是人生夥伴 串連人生種種事
辭任後，目睹香港經濟衰退，曾考慮移民外地，那時張文龍才三十出頭，心裏想着正值「人生黃金十年」，「其實我依家呢個歲數真係人生黃金十年，有好多如果依家唔試就真係唔洗試，但喺香港依家咁嘅階段，又真係無機會試，可能真係移民先有機會試。」但是，移去那裏？答案是英國，原因當然也離不開巴士，他搞笑地道：「有雙層巴士嘛！真嘅原因嚟嘅！可以興趣繼續喺嗰度發展嘛！」
去年去英國探朋友時參加當地最大型巴士聚會Showbus （受訪者提供）
Showbus （受訪者提供）
不過，這次他沒有選擇離開，留下來這幾年做過不同工作，努力做他口中的「旅港港僑」：「做咗幾年嘢嗰個感受係，其實依家喺香港就好似在地移民咁，因為我真係要重新適應社會，好多朋友唔見咗，可能入咗去、出咗去，成個朋友班子都已經換哂，其實同我移咗民無分別，只係我唔洗搞簽證或者講嘅嘢小啲，咁我即管留喺度，感受下我屋企地址無變，但我個生活方式唔同咗，嗰種類似移民感覺係點。」
訪問當日，張文龍回到位於長安巴士站旁的安清樓舊議員辦事處，現已轉手成葵青區議會委任議員王聰穎的議員辦事處，張笑言：「唔知係咪特登呢？」
正所謂「三歲定八十」，三歲起做巴士迷，往後人生種種事與巴士息息相關。張文龍形容，巴士是一個有趣的人生夥伴，串連他整個人生中不同人與事：「無咗呢個工具，咁我認識唔到咁多地方，亦都認識唔到咁多朋友，甚至乎依家可能工作，無論係好實際揸巴士或者設計，某程度都係因為呢樣嘢引起，所以其實佢串連咗我人生好多嘅嘢。」談到未來，張文龍說仍想在香港繼續「好好生活」：「繼續喺香港識唔同人，識唔同興趣，自己有玩下唱歌、舞台劇呢啲藝術表演，如果有機會希望可以喺唔同崗位代表香港，同人去切磋下。」
記者：羅仲勤
攝影：范雅盈