葉鴻輝當選傑青 盼退役後培育年青球員接棒
【獨媒報導】香港男子足球代表隊守門員兼隊長葉鴻輝當選十大傑青，是相隔48年後再有本地足球員獲選。他接受電台訪問時坦言自己已步入足球員生涯尾段，不過就未有設下退役年齡，會視乎身體狀態作決定，並計劃之後培育年青球員接棒：「始終年青球員先係香港足球未來，如果佢哋踢得好，咁香港足球先會進步，變得更加好。」
資料圖片
未定退役年齡 盼日後培育年青球員接棒
現年35歲的葉鴻輝已代表港隊上陣111場，是出場最多的球員，葉鴻輝今早接受商台《在晴朗的一天出發》訪問，指自己從來沒有想過當選，「見完評審後都無話太過有期望會得到個獎」，並再次感謝香港足總提名，以及評審及大會的肯定。他又分享面試時情況，包括需要分享過往經歷及未來對足球的理想及與工作，指自己已步入足球員生涯的尾段，近年亦有從事青訓教練工作：「希望退役後可以培訓更多好嘅年青球員去接棒，始終年青球員先係香港足球未來，如果佢哋踢得好，咁香港足球先會進步，變得更加好。」
對上一次有本地足球員當選十大傑青要追溯到1977年的郭家明，被問到相距48年才再有足球員獲選，葉鴻輝謙稱，歷年來都有不少出色的球員前輩，「只不過可能係足總無提名，或者係我叫做襟捱啲、留得耐啲，哈哈哈。」他又慶幸自己多年的職業生涯尚算順利：「至少我冇乜大傷病，咁先可以保持平穩狀態。」他亦直言未有為自己設定退役年齡，認為要視乎自己的身體狀態。
資料圖片
稱欣賞達史迪根踢法全面
葉鴻輝亦談到以前踢街波是被迫做守門員，「迫迫吓，守守吓，人哋射埋嚟，唔知點解我好自然去撲咗個波，就係嗰一下，之後就鍾意咗撲波嘅成功感。」不過，他提到今時不同往日，現時年青人會主動提出擔任守門員：「啲人以前係迫佢守龍㗎嘛，而家係自己爭住守龍。我都真係唔知（點解），唔知係咪而家世界級龍門勁咗，或者啲小朋友睇嘅嘢唔再好似以前咁。」至於近年欣賞的守門員，葉鴻輝就指是效力巴塞隆拿的達史迪根，指對方踢法全面，「撲救又好，出嚟禁區外解圍判斷又好，用腳方面又好，好符合現代足球踢法。」
資料圖片
自認比賽投入 風格火爆
被問到是甚麼風格的守門員，葉鴻輝指：「我自己風格·····叫做······火爆？同埋高投入！」他指在比賽不時要喝斥後衛﹐並笑言「大家睇啲片都應該睇唔少」。他又指平日「冇乜嘢」，只是在比賽中會較投入「變咗另一個人」。葉鴻輝又認為隊中每個位置都有其職責，「無話我呢個位特別重要」，強調每一名球員都十分重要，需要互相幫助，減低犯錯，又打趣指最希望對方零攻勢：「咁梗係啦，唔洗做呀嘛大佬，不過當然無乜可能。」
資料圖片
最難忘東亞運奪金：好奇妙夢幻
對於有沒有難忘的失球或撲救，葉鴻輝坦言兩者都沒有特別：「始終踢咗太多年波，都有太多撲救同唔少失波。」不過，最難忘的比賽一定要數到2009年東亞運決賽擊敗日本奪金，葉鴻輝指賽前並沒有人看好港隊，甚至隊內都「唔覺得自己可以行到呢一步」：「成個故事好奇妙夢幻，由自己都唔信自己到最後攞冠軍。」他指當時於分組賽出線後，隊內開始重拾信心，之後四強再擊敗朝鮮，到決賽對日本時每人心態已是「唔係喎，呢場波我一定要贏個金牌返嚟」。
被問到港足在東亞運奪金後未有把握機會增撥資源發展，葉鴻輝不同意，指近十年的資源逐漸增加，港足亦有自己的訓練基地，不需如從前般到不同球場訓練，加上政府對足球的支持亦有改善，有能力聘請外國教練及改善設施。談到港隊於啟德對孟加拉再次「爆棚」，葉鴻輝認為很多市民都希望親身感受啟德的球場：「尤其是上次對印度坐爆咗，亦都好順利贏到波，相信係嗰個氣氛，加埋賽前個Tifo，最緊要係個球場有冷氣，相信係所有嘢加埋先延續到落嚟。」