江玉歡向傳媒派餅 否認為散水餅「唔好咁悲觀」
【獨媒報導】所謂萬物皆有時，不少立法會議員「栽種」多年寄望連任，卻料不到現在就是「被拔出」的時候。近日立法會瀰漫棄選消息，不同名字也被捲入討論，曾暗示不連任的選委界立法會議員江玉歡，今早在立法會請傳媒食西餅。不少記者問她是否意味「派散水餅」，江玉歡笑言「唔好咁悲觀」，主要是想感謝記者，特別是下星期是立法會最後會期，很多人會酬謝傳媒，「我請你哋食咩都唔會覺得好食」，她再三強調是「感謝餅」非「散水餅」。
至於她本人的去向，江玉歡表示下周三或四會公布去向，「留返22、23號，心底裏最誠懇同市民講返幾句說話」，再次感謝傳媒過去4年努力，又稱「唔需要擔心，我會同市民交代」。
交代的會是好消息抑或壞消息？江玉歡笑言「好難講好消息定壞消息，唔好用好同壞嚟形容」，重申留待下周一併公布：「好希望能夠同市民講多謝嘅說話。同埋覺得任何嘢都要積極，人生裏面有好多唔同崗位。」有記者問是否轉換新崗位？她笑稱「新崗位又唔好」。
已宣布不競逐連任的盧偉國今午向記者派自家製的楊枝甘露糖水。
回應70大限 梁君彥：係時間唔做，咁咪係就咁
揭開「大換血」序幕的大主席梁君彥，近日備受同事之間的壓力，原先23日立法會最後會期的餞別晚宴取消。他中午離開立法會會議廳時，被記者問到下屆「大換血」的情況。梁君彥表示每屆議會選舉都有「更替」，外國議會的更替「分分鐘可以變天」，認為這僅是議會選舉生態。被問到帶頭棄選會否為70歲以上的議員帶來壓力？他則指屬議員個人決定，直言：「人哋其他議員點樣諗，就係佢自己嘅決定。唔通我話有壓力唔做咩？所以呢個都係普通嘅更替。」
梁君彥又指不清楚有70歲大限說法，稱：「我係74歲，咁我又覺得係時間唔做，咁咪係就咁樣囉。」至於社會是否準備好年輕人接班，他則稱：「個社會都係準備畀年輕人接班㗎啦，長江後浪推前浪呢個係永恆定律嚟。」