【獨媒報導】港超聯周六（18日）上演兩場賽事，分別於大埔運動場及旺角大球場。球迷Jeffrey為方便觀眾「連睇兩場」，特意安排「大埔旺角港超特急線」，租用紅色小巴接載球迷由大埔完場後直達旺角，每位車費20元。在社交媒體公布後，不消5小時便已「客滿」，Jeffrey坦言「真係嚇親」、「完全冇諗過咁受歡迎」﹐並自製車票予球迷留念：「一個城市仔有咁嘅頂級聯賽都好罕見，亦都有一班咁熱情嘅fans，所以我都好想支持同方便吓各位。」

曾大埔旺角連趕兩場：真係好鬼急

港超聯周六兩場賽事，頭場下午3時開始，由大埔主場迎戰傑志，尾場則傍晚間6時開始，由理文於旺角大球場對東區。球迷Jeffrey賽前兩日在社交媒體Threads發文，提出「大埔旺角港超紅van特急線」，租用一輛紅色小巴在大埔完賽後直接載球迷到旺角，享受另一種「雙料娛樂」，每位乘客收費20元。


Jeffrey

球迷 Jeffrey向《獨媒》表示，曾經試過於大埔觀賞完頭場比賽，緊接「衝出」旺角看尾場賽事，大嘆：「我真係覺得好鬼急，去到嗰度又miss咗頭5至10分鐘，有啲可惜，同埋我都幾鍾意睇全部球員行出嚟嘅畫面。」他認為大埔去旺角的紅色小巴線「好iconic」，於是嘗試包車方便球迷「連走兩場」：「一個城市仔有咁嘅頂級聯賽都好罕見，亦都有一班咁熱情嘅fans，所以我都好想支持同方便吓各位。」

不消5小時已滿座 搞手：完全冇諗過咁受歡迎

Jeffrey起初本著「貼錢都照玩吓」的心態策劃，指在周三與朋友提及想法後，僅用了30分鐘便向小巴公司落實預約，在Threads發出貼文後不消4至5小時，更已售罄所有車票，坦言「真係嚇親」。他稱，租車成本為300元，出售所有車票大約300多元，扣除成本剩餘資金製作紀念車票送給球迷，笑稱：「完全冇諗過咁受歡迎，我原本仲諗住倒貼一嚿水左右就開心㗎啦，點知竟然買得晒啲飛。」他又表示最困難的地方是安排小巴停泊位置，指大埔運動場屬禁區，故需要到步程5分鐘的翠怡花園巴士站上車。

然而，到實際運作又是另一回事。由於大埔對傑志的賽事下半場補時長達16分鐘，最終比賽於5時08分才完結。一完場，Jeffrey馬上到球場閘口舉牌，迎接已一早報名的球迷，再帶領一行19人到巴士站上車，雖然原定5時10分開車延遲至5時20分，不過最終有驚無險，仍然趕及尾場開賽前5分鐘抵達旺角大球場。

自製車票贈球迷 盼「記得有過呢件事」

另外，Jeffrey 將剩餘資金自製「紅Van港超特急線」實體車票贈予球迷。「車票」以機票作為設計概念，印有日期、目的地及登車時間。他指自己乘搭飛機亦會保留票尾，「有呢個港超特急線，梗係整返張被俾佢哋留念」：「當係一個回憶記得我飛過呢間公司，飛咗去邊度，玩咗啲咩咁。」他認為實體票有紀念價值，每一場港超聯賽事門票都有保留紀念，但指最近港隊比賽均為電子門票，「其實我都有啲唔開心，所以我印返少少手信仔，當啲人可以記得有過呢件事，感覺實質啲」。

被問到反應良好會否再安排「特急線」﹐身為九龍城球迷的 Jeffrey就表示，因為下周九龍城主場迎戰港會，所以無法安排小巴，但笑言：「如果有人有興趣幫手，下個禮拜我都可以send個form出嚟，跟住交contact俾佢哋去organize，暫時半個月至一個月都無機會。」他強調有機會再安排「特急線」，但要因應賽程及時間，又打趣指南區比賽應該租冠忠巴士，並希望「如果球會有啲肯take on responsibility，我都會交低啲contact俾佢哋搞」。

羅振庭被逐 大埔傑志打成平手

至於賽事方面，大埔因顧及下周四（23日）亞冠二主場對北京國安﹐今仗只派出保連奴、米基爾古圖斯及加比爾3名外援任正選。傑志則盡遣6名外援及U22小將林柏燃﹐前皇馬中場伊拿拉文迪仍然未能上陣。雙方上半場初段慢熱，33分鐘，羅振庭禁區外遠射中楣，是大埔最具威脅攻門。39分鐘，利安度射門省中杜國樑右手，球證翻查VAR後指阿祖安越位在先，未有判罰十二碼。補時階段，顏卓彬為大埔主射罰球，柱邊出界，半場雙方互交白卷。

換邊後，大埔先後換入費蘭度、韋法頓、馬卡雷拿及添姆高夫斯基加強攻勢。63分鐘，米基爾古圖斯接應添姆高夫斯基回傳勁射，王振鵬撲出皮球，馬卡雷拿再頭槌補中，大埔領先1：0。67分鐘，神田夢實右路傳中，阿祖安第一時間接應撞射，謝家榮情急之下拍下皮球入網，傑志扳平1：1。

72分鐘，羅振庭與米基爾古圖斯「雙人飛剷」陳俊樂，其中前者舉腳踢中對方右膝，球證原先給予羅振庭黃牌，但在視像助理裁判介入下改罰紅牌離場。大埔在打少人一人下全軍退守，不過有加比爾傷出，韋法頓亦一度需要到場邊治理。在補時長達16分鐘下，雙方再未有入球，賽事維持1：1完場。今場總入場人數為1,270人。