梁君彥澄清「畢業飯」無翻生 上周到會錢已收 明日飯商「拎返嚟畀我哋食」
【獨媒報導】立法會突然打開「換血」序幕，不同政黨板塊大亂陣腳，議員們尷尬萬分甚至有感「不如不見」，本來明晚在中環餐廳吃「畢業飯」餞別，亦因為「場地問題」而告吹。有傳媒報道「畢業飯」有望起死回生，不過有盛傳被迫棄選的新民黨主席葉劉淑儀就表明不領情，反問：「你忽然間話畀我知，我點安排？」大主席梁君彥在年結記者會上「闢謠」，澄清並非「畢業飯」翻生，只是上周突然取消與特首舉行的「惜別午宴」，因為已經支付承辦商，對方因此安排「聽日拎返嚟畀我哋食」。他強調沒有要求議員參加，「邊個得閒咪邊個食囉」，亦不會有儀式。
各個政黨近日將會交代出選名單，至今仍然未交代是否「棄選」的新民黨主席葉劉淑儀，今日在立法會被傳媒問到會否出席明天懷疑「翻生」的聚會。葉劉表示近日已經安排繁重工作，不會出席，又質疑：「你忽然間話畀我知，我點安排？」
葉劉淑儀
承辦商要處理「剩返啲嘢」
立法會主席梁君彥在年結記者會上，被問到最後一次「畢業飯」亦未能齊腳，為4年議會畫上如此句號是否好事。梁君彥面帶笑容，澄清明日的聚餐不會「翻生」，首先因為特首李家超不會出席。他又解釋明日聚餐的因由，是因為上周取消特首與議員的「惜別午宴」，與承辦商討論「剩返啲嘢」，對方堅持要收錢，「咪拎返嚟畀我哋食，就係咁簡單」。
他又指每逢周三開會，秘書處都會安排「喺出面買嘢返嚟食」，明天也是一次「正常」的開會簡單午餐，他強調只是因為「我哋剩返啲錢喺人哋度，人哋 offer 喺度煮返畀我，咪聽日食埋佢」。他澄清明日聚餐沒有要求議員參加，「喺度咪參加囉。同埋都唔係一齊坐低一齊食，邊個得閒咪邊個去食囉。又唔會有儀式，又唔會咩。」
反駁市民唔識議員 「我哋唔係做娛樂界」
有記者亦問大主席，對於議員私下表示感到「低氣壓」的意見，梁君彥表示上周五取消「惜別午宴」，是因為有議員向他表達「唔係好適合」，他與特首辦商量後，認為取消「都係好事」。他又稱議員近日或感有「離愁別緒」，「有時氣壓低嘅、氣壓高嘅，我臨尾會講啲嘢，咪令大家氣壓高囉」，他勸勉議員「畢業喇，揸住個好好嘅成績表，相信我哋啲議員都覺得開心嘅」。
至於有市民反映「唔識啲議員」，又認為90名立法會議員太多，梁君彥表示不同意，「我成日講，人多好做作做作」，立法會有多個事務委員會，90名議員「大把嘢做」，只是傳媒不會追蹤每一個立法程序，他認為議員人數多「無咩特別問題」。他又反駁指「我哋唔係做娛樂界」，正如一套戲有90個主角，「你做觀眾都認唔到咁多主角」，他又稱在其他議會，要求市民數出10個議員名稱亦非易事。最後他又提醒，有志參選的年輕人要緊記，立法會是「金魚缸」，每件事都會被放大，議員「做嘢要好小心」，私人生活亦要做好榜樣。
