【獨媒報導】今日是立法會選舉換屆投票日，政府因應大埔宏福苑五級火，調整了三個投票站，《獨媒》到其中一個投票站香港教師會李興貴中學視察，截至下午1時30分，該票站累積投票人數為2,072人。「肥媽」今早亦到場投票，稱「支持政府呀嘛」，又指表示上屆議員辦事較慢，「人哋真係做咗好多嘢，只係做得慢一啲，我嗰腦都慢咗啦」，期望新議員「年青啲，做嘢積極啲」。另有宏福苑受災居民指投票時考慮候選人過往政績，災後重建仍需多方配合，而投票亦是公民責任，「政府對我哋咁好，我實嚟投返票。」

大埔區其中的三個投票站，分別位於大埔浸信會公立學校、廣福社區會堂及大埔社區中心。受大埔火災影響，當局更改投票站位置，改為香港教師會李興貴中學、大埔崇德黃建常紀念學校及羅定邦中學，並安裝免費接駁交通來往投票站和廣福邨等地。

《獨媒》所在的李興貴中學票站，上屆票站（大埔浸信會公立學校）錄得2,641票，而今屆截至1時30分，累計投票人數已經貼近上屆八成，最終數字很有可能超越上屆。

「肥媽」 用自己做比喻 年紀大「跑步、個腦都慢咗」

人稱「肥媽」的 Maria Cordero 今早前來李興貴中學投票，稱「支持政府呀嘛」，期望新議員「年青啲，做嘢積極啲呀」，「以前真係慢，講真係慢啲。以前唔係做唔到嘢，唔可以抹殺，我哋香港咁耐，個個都做到嘢，但年紀一路一路大，好似我咁，我跑步都慢咗啦。」

被問到「以前」即為何時，「肥媽」反問記者：「就上一屆咋嘛，你唔覺得慢咩？」，「救火都慢咗啦，啲消防員使乜死啫，如果啲棚啲嘢 check 多啲，點會畀人用發泡膠，點會用到呢啲？唔係佢哋唔做嘢，係慢咗啫」，重申不能抹殺他人功勞，「人哋真係做咗好多嘢，只係做得慢一啲，我嗰腦都慢咗啦。」

她又表示，投選候選人時視乎其歷練，希望給多些機會年青人，「唔好好似我哋七十歲、八十歲都仲做嘢先得㗎。」

宏福苑居民指投票考慮候選人過往政績 災後重建仍需多方配合

宏福苑宏新閣一手業主丘先生及其太太每屆選舉均有投票，他表示會考慮候選人以往在大埔的政績及政綱，「唔係淨係為我哋宏福苑。為全香港、為全大埔。唔通淨係同我哋宏福苑做嘢，呢啲唔使幫咩？」他亦認為發生大火後得到很多支援，而投票是公民責任，「政府對我哋咁好，我實嚟投返票。」


丘先生

行政長官李家超早前提到如期完成選舉可令新一屆議員盡早履職，加快災後重建工作，丘先生則認為「唔係立法會議員做得到」，是由政府主導，亦需要多方面配合。那議員的角色為何，他則稱：「冇咁多反對聲音都係好嘅，所有事情有人提議覺得係好嘅都推行得到，2021年以前乜嘢都反，唔係咁好囉。」

廖先生原本跟父母居於宏福苑宏盛閣已三十多年，因受大火影響現暫居於三門仔「善樓」，今早一起乘搭政府專車到李興貴中學票站投票，期望當選議員長遠協助居民安置，「睇吓點樣幫宏福苑住戶上到樓，睇吓點樣追討賠償。」他又提到，現時安排混亂，「一戶一社工都未幫到手，好多嘢都係自己同社工講，佢哋可能手頭上嘅資訊都唔夠」，要靠住戶主動跟社工聯絡。


廖先生

版權: 
禁止衍生