【獨媒報導】由香港戲劇協會主辦的香港舞台劇獎頒獎禮，謝君豪憑《天下第一樓》贏得最佳男主角（悲劇／正劇），歷來首次成為劇帝。他笑言以為是魔咒冇得攞，「今日魔咒終於解除好開心」，並指劇協連續34屆舉辦頒獎禮並不容易。在頒獎禮後，《獨媒》記者提到，劇協已是連續三年自資舉辦頒獎禮。謝君豪就稱「加油」：「加油！我哋都支持。第一屆我已經參加㗎啦，喺酒樓聚餐嘛，十幾廿圍喺度，喺酒樓個台上宣布得獎名單嘛，嗰時好原始但又好開心，我哋一套戲坐一圍㗎！」

作為劇壇「大師兄」，謝君豪憑着《天下第一樓》重演版本贏得該獎項，並從上屆最佳女主角蘇玉華手中獲獎，二人亦曾經在《南海十三郎》中合作。

電影《寒戰1994》傍晚舉行香港首映禮，謝君豪先到戲曲中心出席，再趕到劇協頒獎禮。謝君豪上台領獎時稱此情此景，想起去年由自己頒發予蘇玉華，想不到今年則由蘇玉華頒予自己，「世事你話幾咁奇妙」。

謝君豪指劇協自首屆舉行聚餐開始頒獎，至今已34屆，「到依家真係不容易」：「呢個魔咒一直捆綁咗我34年，無錯，今日呢個魔咒終於解除啦。」

重演成功找到港人風格《天下第一樓》

此外，謝君豪指今屆兩名對手余翰廷、陳嬌都很厲害，自己亦只是重演，「諗住都係咩㗎啦，結果真係OK！」他自言十分幸運，先嗚謝香港話劇團，稱自己畢業後已加入該劇團：「我一直都當自己係香港話劇團嘅人，佢搵親我實去。」他又感謝創作《天下第一樓》劇本的何冀平，並多謝導演司徒慧焯。

謝君豪認為，今次重演成功找到香港人風格的《天下第一樓》，稱首次排戲的時候有感每個角色都很好，但一度對自己的角色沒有感覺，自言有時候亦是硬着頭皮上，及後排戲的時候，才開始投入「夜場經理」的角色。另一「大師兄」黃秋生及後獲邀上台，與謝君豪及蘇玉華合照，台下即時拍掌起哄。

憶首屆在酒樓舉辦 義不容辭為香港舞台劇

在頒獎禮後，被問致今日同一時間為《寒戰1994》首映記者會，有沒有想過缺席劇協頒獎禮。謝君豪稱「咁又唔會唔嚟」，指「《寒戰》嗰邊好好啦」：「我話劇協頒獎禮我都要去㗎，我都要支持㗎，完咗佢哋個首映儀式、行晒紅地毯、搞晒嘢啦，佢哋就俾我嚟囉。」

《獨媒》記者提到，劇協已是連續三年自資舉辦頒獎禮。謝君豪就稱「加油」：「加油！我哋都支持。第一屆我已經參加㗎啦，喺酒樓聚餐嘛，十幾廿圍喺度，喺酒樓個台上宣布得獎名單嘛，嗰時好原始但又好開心，我哋一套戲坐一圍㗎！」

謝君豪補充說自己舞台劇出身：「香港話劇團叫我返嚟做嘢，我一定做㗎。香港舞台劇有咩要我做嘅，我都會義不容辭咁去做囉，係好自然一件事。」

楊樂文：feel 到滿滿嘅愛

此外，男子組合MIRROR隊長楊樂文憑《我推的男子》獲提名最佳男主角 (喜劇／鬧劇)。《獨媒》問到首次參加舞台劇獎的感受，楊樂文則稱「好熱鬧」：「成日聽人講劇場充滿愛嘅，今日差唔多全部都劇場人，feel 到滿滿嘅愛囉。」

楊樂文續指，劇協與其他頒獎禮最不同或許規模較小，「但人與人之間再近多少少」：「點解會嚟係因為有提名嘛，咪嚟參與囉。」