【獨媒報導】今屆香港舞台劇獎頒獎禮曲終人散，卓韻芝憑着《我無醉》首次贏得最佳女主角 (喜劇／鬧劇)。在頒獎禮後，《獨媒》記者問到對留港創作的看法，卓韻芝稱作為創作人，「喺香港咁嘅環境」：「不如我咁講，就算呢套《我無醉》嘅戲劇都係我自己編、自己演，背景都係香港。我覺得香港一定有好多嘅自我審查，我絕對係明白嘅，但我睇返我最喜歡嘅作品，無論係劇作又或者係文學書籍、電影，都喺唔同時代，嘗試喺自己嘅框裡面講出自己相信嘅一句，呢個就係我會繼續努力落去嘅原因。」

不評論《送院途中》被DQ 卓韻芝：我今日就唔可以

卓韻芝又表示：「如果我全個書櫃嘅書嘅作者，佢哋都繼續努力，如果我睇過所有舞台劇嘅飛尾，我留返，嗰啲創作人都喺唔同時代都唔係容易㗎，你估喺波蘭容易啲咩？佢哋都繼續努力，我都會㗎。」

此外，香港電影金像獎早前DQ四套電影，當中包括由卓韻芝執導的《送院途中》。卓韻芝表示今日的場合不方便回應：「我今日就唔可以，唔想講其他嘢，因為我驚，好似會，點解阿芝攞一個呢度嘅獎，但我會comment 其他嘅嘢呢？你另一日搵我，我一定會願意答你。」


何俊傑

何俊傑：好好守護劇壇、好好守護年輕人

頒獎禮連續三年未獲藝發局及康文署支持，香港戲劇協會今屆繼續自資舉行，並製作了一系列紀念品發售以籌募資金。

在其他獎項方面，何俊傑憑着《我佛無著經》贏得最佳原創音樂（音樂劇），他在得獎後上台提到其「中年危機」。他記得中英劇團的劇目《相約星期二》，其中一個角色：「依家係後生仔嘅世界嚟㗎啦，點到我哋話事呢？」但老師反駁他：「你就錯啦，世界點會係後生仔嘅世界嚟㗎？佢哋個個都唔得㗎，又懶，又無料。」

當時，何俊傑覺得這老師的角色說得很有哲理，是正確的，但現在他開始懷疑：「點解呢個唔係後生仔世界？好多好年輕、啱啱出道、仲讀緊書嘅人⋯⋯ 希望大家好好守護劇壇之外，仲要好好守護年輕嘅佢哋。」


胡麗英

風車草劇團場地夥伴計劃落選 胡麗英：大家都好正向，仲搵緊門路

此外，胡麗英憑風車草劇團《偷偷記得》獲頒最佳女配角（悲劇／正劇）。該劇去年在葵青劇院上演，惟風車草劇團去年底未能入選康文署的「場地伙伴計劃」名單而失去場地。

《獨媒》問胡麗英，對此有否感到可惜或憂慮時，她就表示：「 我覺得大家都好正向，仲搵緊門路，去敲門、遞申請表。嚟緊《SuBeDoWa音樂會2026》5月喺上環文娛中心做。雖然無咗場地伙伴計劃，但佢哋仍然有出路，可以繼續申請唔同嘅場地。」

胡麗英續指，多謝風車草劇團提供平台予其創作，形容是非常特別的劇團：「陸昕、阿祖（梁祖堯）佢哋係我同班同學，阿君（邵美君）係我師姐，Ah Dee（湯駿業）係我師弟，呢種好近嘅bonding已經係好特別嘅存在。」在訪問後，她不禁輕拍記者膊頭。