【獨媒報導】大埔宏福苑居民連日上樓執拾，位於大埔廣福道的一間懷舊玩具店，店主馮伯在居民上樓期間，免費送贈紅白藍膠袋和借出手拉車，冀方便居民回家取物。《獨媒》向馮伯查詢時，他希望送上心意支持街坊，強調不欲高調張揚，認為「我依啲好少意思㗎咋」，「我能力有限，即係做得幾多得幾多。」

宏福苑居民第十日上樓執拾，馮伯在店外放置一塊心型的展板，上面寫有向宏福苑居民送兩個紅白藍袋、可免費借用手推車等，並寫上「祝君上落出入平安」的祝福字句。展板強調「店小力薄」，若紅白藍膠袋派發完畢請見諒。

《獨媒》向馮伯查詢時，他指至今已有近30名居民前來領取紅白藍膠袋，部分人在網上看到相片後知悉，另有居民領取膠袋後口耳相傳。有街坊曾入內詢問要否出示證明，馮伯表示不用：「總之我有就遞兩個畀你。」被問為何有該想法，他就輕鬆地說：「無所謂嘅，幫得到人咪幫囉。」

此外，馮伯稱知道居民上樓的期限延長，「我要睇吓啲袋趕唔趕到返嚟先，因為我係訂淘寶嘅嘢嘅！」由於近兩日較多居民前來索取，他已額外再上網訂購，並透露一個大紅白藍袋約需10多元。

他表示自己不想太高調、張揚，強調「我依啲好少意思㗎咋」，「我能力有限，即係做得幾多得幾多，唔係有人嚟就派、有人嚟就派咁樣，又未做到咁樣。」總之街坊經過見到，他又有貨便派給街坊，「做到送完咪算！」，「我唔想少少嘢做到⋯⋯尤其是我喺度做咗廿幾年，我唔想搞到好似好出風頭。我只係見到有嘢幫，幫得到就幫。」

馮伯最後稱，自己亦是大埔居民，做的是街坊生意，區內很多街坊都認識自己。在大火當日，馮伯正在開舖，憶述下午的時候從廣福道望向宏福苑，看到大火的位置和濃煙，行人不斷說起「火燭呀、火燭呀」：「冇諗過咁犀利，以為普通火燭，晏啲見到越燒越犀利，先知係大鑊嘢。」

版權: 
禁止衍生