【獨媒報導】宏泰閣、宏建閣居民今日繼續上樓執拾，宏泰閣居民葉先生的父親、妹妹不幸在大火中喪生，葉太今日下午與丈夫上樓執拾，並攜同兩束鮮花悼念他們。葉太接受訪問時憶起，昔日一家人在單位內整蘿蔔糕，及吃飯後沿路走進宏福苑，期間聊天嬉戲等溫馨畫面，幾度哭成淚人：「依家蘿蔔糕意義無咗⋯⋯無咗，嗰種溫馨同開心係無價。」她最希望，上樓能夠取回十多年前嫁入葉家時，在宏福苑時拍攝的全家福合照。她特意以哈哈笑emoji遮住合照上的樣貌：「我哋一家人係好開心㗎。」

「我屋企人走咗。」

葉氏一家多年來居住在廣福邨，葉父後來買入宏福苑宏泰閣8樓單位，葉先生在與妻子結婚後才遷出。在大火當日，葉太乘坐的士趕到宏福苑，到達後已熊熊大火，警方已拉起封鎖線，遂只能到廣福社區會堂登記家人資料。

訪問期間泣不成聲 內疚大火當日無報警

說到這裡，葉太已泣不成聲，對當日未有即時報警感到內疚：「完全唔知道要報警⋯⋯我完全唔知，無做到呢樣嘢，我淨係識周圍登記，但登記傳達唔到屋企有人。就係因為我無報警⋯⋯啲水永遠都去唔到高，睇住佢燒晒。」「睇返聽證會新聞先知道，報警好重要，點解我無做到報警⋯⋯我無報到警，喺度等唔知點⋯⋯。」

由於火勢太大，廣福社區會堂及後亦要作出疏散，葉太在疏散期間曾大喊老爺的名字，又問管理員是否看到對方：「佢話睇唔到。我周圍嗌佢個名，但好似無街坊認識佢。」葉太再到區內社區會堂、醫院尋人：「問吓有無昏迷不醒，無身份證嘅人，大約幾多歲，搵囉，無身份證明文件原來通報唔到，唯有逐間搵⋯⋯。」

在大火中，宏泰閣是死亡人數最多的大廈，共有 82人不幸離世。葉家單位的廁所、廚房損毀嚴重，愛護動物協會在其單位內尋獲貓貓的遺骸，烏龜則遍尋未獲。葉太在收到「一戶一社工」的相片後，發現單位內「成屋玻璃爆晒」，憂慮有財物損失，及後報案獲警方回覆指單位沒有搜掠痕跡。不過，她對此感到成疑，指近日有多宗財物失竊情況，形容上樓心情沉重。

上樓執拾逢葉父生忌 攜鮮花上樓悼親人

今日剛好是葉父的生忌，他們攜同兩束鮮花上樓，希望能好好悼念親人。花束由淡黃色菊花、淺藍鬱金香、黃白色小雛菊等組成，葉太緩緩說：「簡單有少少顏色，想俾返少少色彩，間屋已經灰晒。」「我希望有花可以陪伴佢哋，慰藉佢哋。」

隨著上樓執拾的日子臨近，葉太近日不斷看新聞，希望參考其他居民攜帶的裝備，說到這便不禁流淚：「我好驚自己帶漏，好有壓力帶漏、錯過咗，好驚做唔足嘢，呢度之後會拆，拆咗就無咗，行近啲嘅機會都無。」


圖片由葉太提供

頂硬上執拾 望姑仔6月生忌能再上樓

他們希望拾回財物及重要文件。葉太最想尋回全家福合照，她指合照於2012年嫁入葉家在宏福苑時拍攝，相中有她與丈夫，以及老爺、家姑和兩位姑仔。該幅合照原本掛在單位內沙發上方的牆壁，但災後該位置只留下相框的烙印。此外，葉太希望能夠在姑仔6月生忌的時候，可以再次上樓悼念。

葉太坦言，上到單位後或要承受難以言喻的傷痛，但她昨日與丈夫商討的時候，二人決定「點都要頂落去」：「上咗去先算，我哋有我哋嘅使命，就係上去收拾佢哋嘅嘢，有咩情緒之後再處理，全部都要忍，忍咗佢先，唔忍咩都做唔到。」她希望能抱住平和的心情上樓：「嗯，同佢哋道別⋯⋯我唔想道別㗎⋯⋯點解要道別？點解唔可以留長啲時間，或者陪多啲？好似所有嘢都被限制。」


訪問期間多次感觸落淚 指兒子對大埔有陰影

「我忍唔住鬧啲人點解咁無情，心咁壞。我覺得社會變咗，人心黑咗，啲人無情咗，成件事最錯就係⋯⋯點解佢哋喺屋企走唔甩呀？其實佢哋無錯㗎，佢哋只係喺屋企咋，喺自己最舒服嘅環境咋。」

在訪問期間，葉太多次感觸落淚，指兒子在大火後既想念大埔，但亦對大埔有陰影：「其實唔需要幫助㗎⋯⋯只要佢哋喺度，我哋屋企人互相扶持⋯⋯足夠啦，平安無事就足夠啦，錢財身外物，人喺度係好重要㗎。死咗個人，俾咗啲錢算係咩？賣咗個單位，沿路唔好再回憶？算係點呀？我唔係喺嗰度住、嗰度大，但由同我老公拍拖、到我嫁入去，到依家我都有感情㗎，20年啦⋯⋯成日都喺屋企望到景觀。我連我個仔5歲幾，都記得爺爺、姑姐⋯⋯屋企係點樣。咁細個小朋友PTSD呀？點樣彌補佢個心穿窿？」

憶昔日溫馨畫面 難忘一家人整蘿蔔糕

她又憶起一家人昔日在街吃飯後，沿路走進宏福苑，期間聊天嬉戲的的溫馨畫面，「依家望住，我都唔知點解呢件事會發生，無人需要負責，淨係一句唔知道、唔清楚、唔理想。我哋無say，一直都無say，由發生呢件事到援助，一直都無say，有無諗過我哋想唔想要？」

葉太十分想念在宏福苑的時光，尤其在單位內與家姑、姑仔一起整蘿蔔糕，再與親朋戚友分享，「個個都話好食」，所有畫面歷歷在目：「依家蘿蔔糕意義無咗⋯⋯無咗，嗰種溫馨同開心係無價。」

然而，葉太就對民建聯、關愛隊的「協助」感抗拒，「關愛隊阿豬阿狗著件背心都做得」：「如果我再有嘢唔見，邊個負責？我唔明點解要搵關愛隊。個社會氣氛已經sad，關愛隊係咪安撫到呢？機構反而仲幫到，起碼支持到，明你感受、知你需要咩。」她最後表示，在最脆弱的時候需要扶持，但不希望看到討厭的人、有份造就今次事件的人出現。

版權: 
禁止衍生